LAKIP ang Public and Standards Editor sa Sun.Star Superbalita ug columnist sa Sun.Star Cebu nga si manlalaban Pachico Seares sa gipasidunggan sa awarding sa ika-79 nga Charter Day sa dakbayan sa Sugbo nga gipahigayon sa Radisson Blu hotel niadtong Miyerkules sa gabii.
Usa usab si Oscar Pineda, reporter sa Sun.Star Cebu, nakadawat og mayor’s special awards.
Mokabat sa 80 ka mga pasidungog ang gihatag sa Dakbayan gikan sa Outstanding Individuals, Institutions, Centenarian Awardees, Posthumous Awardees ug Mayor’s Special Awardees.
Kapin usab sa P1 milyon ang gigahin sa Kagamhanan sa Dakbayan isip ganti alang sa awardees.
Nakadawat og P100,000 ang matag usa sa unom ka mga centenarian.
Nagkadaiyang personalidad usab ang gipasidunggan, lakip niini ang nakatampo sa kalambuan sa Sugbo pinaagi sa industriya sa show business nga sila si Richard Yap ug Kim Chiu.
Nitambong usab sa maong kalihokan sila si kanhi Gobernador Pablo Garcia, 3rd District Rep. Gwendolyn Garcia, One Cebu gubernatorial candidate Winston Garcia ug kanhi mayor sa Dakbayan sa Sugbo, Alvin Garcia.
Lakip nga nitambong Sugboanon nga mang-aawit nga si Anna Fegi-Brown kinsa nihatag sa iyang awit.
Si Mayor Michael Rama, sa iyang speech, mapasalamot sa mga napasidungan tungod sa paghatag og dungog sa Sugbo.
Giawhag ni Rama ang mga Sugboanon nga hagiton ang tagsa-tagsa nga kaugalingon aron sa pagkab-ot sa kalamposan ug ipadayon kini.
Aduna usay 22 ka mga barangay ang gipasidunggan sa mayor ubos sa serbisyo publiko.
Lakip niini ang mga Brgy. Apas, San Nicolas, Ermita, Guadalupe, Hipodromo, Inayawan, Labangon, Lorega, Bo. Luz, Mabolo, Pasil, Punta Princesa, Cogon Pardo, Pob. Pardo, Quiot, Sambag II, Sawang Calero, Sta. Cruz, Sto. Nino, Suba, Tejero, Tisa.