DUHA ka mga polis nga magsilbing traffic investigator ang gipahimutang karon sa matag police station dinhi sa dakbayan sa Cagayan de Oro.
Kini ang gibutyag ni Cagayan de Oro City Police Office Director Ronnie Francis Cariaga ug midugang nga gikinahanglan kini pag-ayo sa matag-istasyon tungod kay ang dagan sa trapiko ning panahona dili na susama niaging mga katuigan nga dili pa kaayo gakabalda.
Gibutyag sab niini nga ang matag istasyon aduna nay daan duha ka mga traffic investigator apan ning panahona iyang gakamatikdan nga aduna nay laing gipang-atubang nga mga kaso ug giimbestigahan hinungdan bout niyang magpokos kining duha aron mahimong upat ang moatiman sa kaso sa trapiko.
Giabisohan sab niini ang mga station commander nga i- mentor ang maong mga imbestigador aron mas daling makahibalo sa ilang trabaho.
Matod sab ni Cariaga nga daghan siya gakadawat nga mga insidente sa trapiko nga dugay marespondihan tungod kay walay available nga imbestigador hinungdan bout niyang kung adunay mga insidente deretso kining matubag ug maadtoan sa iyang sakop.
Malaumon si Cariaga nga molampos kini nga kabag-ohan nga iyang gipatuman sa matag police station. (SVB)