NAKADAWAT og cash lakip duha ka sako nga bugas ang mga police station sa Misamis Oriental.
Ang mga nakadawat mao ang 23 ka mga lungsod sa este ug weste nga bahin ug laing duha ka dakbayan nga mao ang Gingoog ug dakbayan sa El Salvador.
Gibutyag ni Police Senior Superintendent Rolando Destura, kinsa Provincial Director sa Misamis Oriental Provincial Police Office, nga wala kini nila gidahom tungod kay sa mga niaging pagpamunoan walay mga ayuda nga susama niini alang sa kapolisan.
Nasayran nga gihatag kini sa kagamahan sa Misamis Oriental sa pagpangulo ni Governor Yevgeny Vincente Emano.
Ang cash mobalor og P10,000 matag police station ug duha ka sako nga bugas.
Sa iyang bahin ni Governor Emano, iyang gipasabot nga gihatag kini niya aron adunay kaikag ang mga istasyon sa pagbantay 24 oras sa pag-obserbar sa Semana Santa.
Dugang niini nga sila maoy tigbantay sa kahusay ug kalinaw labina sa mga dagkong selebrasyon ug gikinahanglan nila ang suporta sa kagamhanan.
Nasayran nga dili lang kini ang unang higayon nga nahatagan ang kapulisan apan niagi pa nga katuigan.
Tungod niini, dako ang pasalamat ni Destura nga kanunay gapaluyo ang probinsya sa ilang mga panginahanglan.