GI-TURN-OVER kagahapon ang 27 ka generator sets nga mobalor og P42 milyones gikan sa Vitens Evides International (VEI) ngadto sa Metro Cebu Water District isip tipik sa ilang P376 milyones nga water supply sa mga kabos.
Ang kasamtangang General Manager sa MCWD, Jorge Gabriente, nagkanayon nga niadtong 1990 dihang niigo ang bagyong Ruping, nakasinati og duha ka semana nga blackout ang Sugbo ug apektado ang ilang koneksyon sa tubig.
Apan niining higayona, dili na masubli ang sanglit ang generator sets iapud-apud sa ilang production wells isip panagana kon adunay interapsyon sa kuryente.
Si Rene Mercado, chairman sa MCWD, nagpasalamat sa VEI ug sa Dutch Government kabahin sa grant sanglit nasubay kini sa ilang mandato paghatag og baratong tubig mainom sa Metro Cebu.
Gipangulohan usab ni Mercado ang mga opisyal sa MCWD ug VEI ang pagpasiga sa Christmas Tree sa The Family Park sa Barangay Talamban gamit ang generator set.
Ang VEI sa ilang bahin pinaagi ni Patrick Egan ang ilang project manager mapasalamaton ngadto sa MCWD gumikan sa ilang kooperasyon aron mahitabo ang ilang proyekto.
Ang VEI maoy corporate social responsibility company sa upat ka dagkong water company sa Netherlands.
Ang ubang kaabag sa MCWD sa paghatod og tubig ngadto sa mga kabos mao ang Eau et Vie (E&V), Tubig Pag-asa, The Netherlands Red Cross ug Cebu City Government.
Ang Netherlands Enterprise Agency pinaagi sa Sustainable Water Fund maoy nag-angkon sa P208 milyones sa P376 milyones nga lima ka tuig nga private-public partnership sa water supply project nga makahatag og dakong benepisyo ngadto 80,000 ka mga tawo sa Metro Cebu gikan sa 15,000 ka koneksyon sa tubig.