3 ka balay natumbahan og koral, 50 ka pamilya gipasidan-an tungod sa uwan

TUNGOD sa kusog nga uwan kagahapon sa buntag misaka ang tubig sa sapa sa Barangay Mabolo hinungdan nga natumba ang koral sa usa ka luna nga niresulta usab sa pagkatumpag sa bungbong sa tulo ka mga balay. 

Nahitabo kini pasado alas 9:00 kagahapon sa  buntag sa dan S. Cabahug, Barangay Mabolo, dakbayan sa Sugbo. 

Ang balay nila ni Paz Baldo, Alfonzo Baldo ug Con­chita Lorejo walay bungbong human natumba sa dihang mibigay human mihumok sa yuta ug pagsaka sa tubig. 

Si Paz mipasangil nga ang pag-ali sa agianan sa tubig gikan sa sapa maoy nakai­ngon nga misaka ang tubig ug nihu­mok ang pundasyon sa ilang uyong bahin sa balay. 

Ilang giasoy nga usa ka negosyanteng Insik ang nakapalit sa luna ug sukad nga gia­lihan ang agianan sa tubig sa sapa nagpundo na ang tubig sa lugar samtang misaka ang tubig pag-ayo.

Apan ang tag-iya sa luna nga si Kenneth Chan pinaagi sa iyang foreman nga si Rey Campasas niingon nga dili tinuod nga ilang gialihan ang sapa. 

Samtang, kapin sa 50 ka mga pamilya sa tulo ka mga barangay sa dakbayan sa Mandaue nga anaa naninuyo sa landslide prone area ang gipahimangnuan sa City Disaster Risk Reduction and Management Office (CDRRMO) nga magbinantayon sa paglihok sa yuta ilabi na karon nga nagsige ang pagbunok sa uwan.

Matod ni Felix Suico, pa­ngulo sa CDRRMO nga human nipahibawo ang PAGASA sa pagsige ug uwan, gipaubos na niya ang ilang buhatan sa Blue Alert pasa­bot nga bisan ug day-off sa usa ka kawani mahimo siyang tawagan ug patrabahuon panahon sa e­­­merhensya.

Dugang ni Suico, hugot nilang gibantayan ang mga pamilya ngaanaa sa landslide prone area sa mga barangay sa Casili, Cubacub ug Tawason.

Paambit ni Suico sa mga tigbalita nga may pito ka pamilya nga ilang gi-monitor sa Brgy. Casili, 20 ka pamilya sa Cu­bacub ug mga 30 ka pamilya sa Sitio Kanghang-at, Tawason ang gi-monitor. (DRT, JPP)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph