GAWASNON pa ang usa ka 50 anyos nga lalaki human giingong milugos sa tulo ka magsuon sa dakbayan sa Balingasag, Misamis Oriental.
Ang suspetsado nga gipangita pa karon sa kapolisan sa Balingasag Police Station mao si Bonifacio Cuseco alyas Pasio, ulitawo, residente sa susamang dapit.
Gibutyag ni Police Chief Inspector Brian Inojaldo, hepe sa Balingasag Police Station, nga ang mga biktima pulos minor de edad nga magsuong babaye, usa niini 9 anyos ug kaluha nga 5 anyos.
Dugang niini nga kining suspetsado igo lang gipapuyo sa pamilya sa mga biktima sa ilang panimalay tungod kay apektado man ang balay niini sa road widening ug tungod kay walay mapuy-an gipapuyo sa mga ginikanan sa biktima.
Dako sab kaayo ang pagsalig sa mga ginikanan niini tungod kay manghihilot usab kini ug gani kon adunay gabation ang mga bata kini maoy gahilot.
Apan bag-o lang gikatingala sa ginikanan nganong milakaw kalit ang suspetsado ug nasayran gikan sa 9 anyos nga sila diay kanunay na nga lugoson.
Tungod niini daling nagpakitabang sa kapolisan ang mga ginikanan ug dihang gipaubos sa medical examination ang mga biktima positibo kining gipanglugos.
Sa pagkakaron, gawasnon ang suspetsado nga padayon pa nga gipangita sa kapolisan ning panahona.
Gihangyo usab sa kapolisan kon kinsay nasayod sa nahimutangan niini itaho sa ilang buhatan.
Hangyo lamang sa kapolisan sa mga ginikanan nga nagbaton og mga babayeng anak nga kung mahimo dili magpapuyo og si bisan kinsa labina dili masinati ang ilang mga kinaiya.