GIPAYUKBO sa Teleperformance (TP) ang VXI Robinsons sa iskor nga 56-50 sa finals aron matuman ang three-peat misyon sa Davao Inter-BPO League (DIBL) Invitational Basketball Tournament niadtong Dominggo didto sa Montaña Recreation and Fitness Center sa Dacudao Avenue sa Agdao, Davao City.
Si Ed Cañedo milabay og 12 puntos, upat ka rebounds, tulo assists ug tulo ka steals aron mabulsa ang finals most valuable player (MVP) award samtang ang teammate Lou Gracilla giilang conference MVP nga may average 15.1 puntos.
Ang ginaatangan nga duwa tali sa way pildi nga tim mitala og mga tabla nga iskor apan nakontrol kini sa TP sa uwahing duha ka minutos sa final period aron madepensahan ang titulo.
Matud ni TP coach Peter Epe, sa pakighinabi sa SunStar Davao, nga usa ka lisud ang panagtigi diin ang duha ka tim gusto modaug.
"Nakalamang lang mi sa breaks of the game. Gi-challenge nako sila nga kung kinsa'y mobigay sa fourth quarter mapildi jud," paghinumdum ni Epe sa krusyal minutos sa finals.
Dugang sa beteranong coach nga usa ka malampuson ang pagdepensa og titulo diin unang higayon sab nga ang tim way pildi gikan sa eliminasyon hangtud sa kampeyonato.
Nagpasalamat sab siya sa TP management alang sa suporta ug pagsalig lakip na ang mga magduduwa nga miduwa og kinakasing-kasing.
Ang mga pambato sa TP mao sila Daryl ug Levi Ochate, Arnulfo Dula Jr., Lanz Kevin Uy, Crizon Decena, Justin Mark Bongalo, John Rey Del Rio, Roberto Dalisat Jr., Patrick Funa, Giussepe Yves Inso, Fernan Ricky Bagolor, Elijah Lael Ramos, Rome Vhon Neri, Michale Angelo Pates, Virgil Flores, Paul Vincent Miñoza, Jaysan Fernandez ug Joseph Anthony Creencia.
Samtang nabutang sa ikatulong puwesto ang VXI SM pinaagi sa pagpalukapa sa Offsourcing Philippines, 65-62,sa torneyo gitugutan sa Samahang Basketbol ng Pilipinas.