SA unang adlaw sa pagpatuman sa mando ni Cebu City Mayor Tomas Osmeña sa pagsikop ug pag-impound sa mga sakyanan nga mo-counterflow, 30 na ang nasikop.
Kini naglakip sa 28 ka mga motorsiklo, usa ka PUJ ug usa ka pribadong sakyanan.
Apan nipasabot si Osmeña nga mahimo rang maka-overtake sa sakyanan nga gisundan basta masiguro nga luwas gikan sa kasugat taliwa sa padayon nga implementasyon niini.
Si Osmeña niklaro nga ang pag-isyu niya sa Executive Order 034 mahitungod sa reckless driving, gitutokan niini ang pag-counterflow sa mga driver nga bisan wala nay kaagian ang iyang gimaneho, molusot lang gihapon.
“Ang kanang counterflow is when there are so many cars there (nagsunod) and you will overtake everybody even if there is no way you can make it to the other side, you just want to use another lane, that’s counterflow,” pagpasabot ni Osmeña.
Ang mayor nihimo og sanglitanan nga kon adunay sakyanan nga nag-una ug hinay ang pagpadagan, mahimo kini nimong unhan pinaagi, apan siguraduhon nga luwas gikan sa disgrasya.
“There is a car that’s slow, you want to overtake, di overtake if it’s safe. But if you’re reaching a point because you cannot really overtake properly, you just want to force yourself, that’s reckless driving. That’s the real violation,” dugang ni Osmeña.
Sa EO 034 sa mayor subay usab sa Republic Act 4136 ug City Ordinance 801, ang gitugotan nga maka-counterflow kun makasugat bisan sa mga nagdulong nga sakyanan mao ang ambulansiya, patrol cars, bombero ug ubang matang sa emergency vehicles.
30 ang nadakpan sa Citom
Moabot ngadto sa 28 ka motorsiklo ug usa ka public utility jeepney ang gidakop sa Citom atol sa unang adlaw sa implementasyon sa EO-034.
Si Francisco Ouano, operations head sa Citom, nibutyag nga didto nila nasikop ang mga motorsiklo sa Banawa sa Barangay Guadalupe ug F. Cabahug sa Barangay Mabolo samtang ang PUJ sa dalan M. Velez.
Matod pa ni Ouano nga ang PUJ naaktohan nga ni-counterflow, nga iyang gihulagway nga nagdali, nga nakahatag og peligro sa kasugat nga mga sakyanan.
Ang mga motorsiklo nasakpan usab nga ni-counterflow sanglit gusto kining mouna sa linya sa traffic lights bisan kon naghunong na ang ilang mga gisundan.
Matod pa ni Ouano nga di dakpon ang mga driver nga mo-counterflow, hilabi na kon ilang makita nga adunay rason sa ilang pag-overtake.
“Okay raman na. Naa may case to case basis mo counterflow sila kay hinay kaayo ilang gisundan. So, mo-consider ra ta ana apan kanang mga motorcyle nga bisan naay kasugat mo-counterflow lang gihapon,”pasabot ni Ouano.
Ang mga sakyanan nga nadakpan ma-impound og 30 ka adlaw sa SRP ug anaa una gibutang sa buhatan sa Citom sa barangay Cogon Ramos.