LABING minos 30 ka mga pamilya nga nagpuyo ilawom sa Mananga Bridge sa Barangay Tabunok, dakbayan sa Talisay gitagalan kutob na lang sa Abril 15 sa pagpahawa sa lugar.
Ang Department of Public Works and Highways (DPWH) migahin og P47 milyones nga pundo alang sa pag-ayo o pagpalig-on sa taytayan, apan ang proyekto nga nagsugod niadtong 2016 wa mahuman kay ang kontraktor di makalihok tungod sa mga nagpuyo.
Ang 30 ka mga pamilya wa mamahawa.
Ang kontraktor ug mga opisyal sa DPWH nagpalaban sa kagamhanan sa Talisay nga tabangan sila sa pagpapahawa.
Niadtong Biyernes, ang mga nagpuyo miadto sa city hall ug gi-estoryahan na sila ni City Administrator Atty. Rudelyn Navarro ug nasabotan nga kutob nalang sila sa Abril 15.
Sama sa gihapon, ang Siyudad walay gisaad nga relocation site, apan sila mohatag og financial assistance.
Wa makatino si Navarro kon pilay kantidad ilabi na kay ang 12 sa 30 ka mga pamilya nakadawat na og tag P3,000, nga gitungaan sa Siyudad ug kontraktor.
Ang Siyudad li pa makatumbok kon pilay ilang ihatag nga kuwarta, apan nipasalig kinig sakyanan nga maoy mohakot sa mga butang kana kon aduna silay kabalhinan ngadto sa layong dapit.
Gitataw usab sa 30 ka mga pamilya nga wa silay plano nga mosupak sa kamandoan tungod kay bisan og diha na sila nagdako ug dugay na sila sa dapit, nahibawo usab sila nga di kini nila maangkon.
Matod ni Salima Villarino, usa sa mga residente, andam ra sila nga mohawa sa ilang gipuy-an bisad di sila mahatagan og relocation site.
Nihangyo sila nga karon nang Abril 15 sakto usab nga mahuman na ang ilang mga anak sa pagtungha.