NAKAKITA ka na ba og perpekto nga destinasyon alang karon Semana Santa din makapahigayon ka sa imong panaad, paghinuklog ug pagpamalandong?
Dili na kinahanglan pa nga molangyaw sa layo nga dapit tungod kay ang probinsya sa Misamis Oriental adunay mga perpektong destinasyon nga pwede kaayo nimo nga bisitahon.
1. Divine Mercy Shrine- Makita ug mas nakapaila og maayo sa siyudad sa El Salvador sa Misamis Oriental tungod sa dako kaayo nga rebolto mga moabot ngadto sa 50 foot statue sa Devine Mercy ug naila kini nga usa ka balaan nga lugar. Panahon sa iyang kapistahan dili mahulogan og dagom ang 9 ektarya nga luna tungod sa kadaghan sa deboto nga palibot ug denhi gakasaksihan ang dancing sun.
2. Hinuklog- USA kini ka tinuig nga kalihokan nga gadagsaon sa katawhan diha sa lungsod sa Medina, Misamis Oriental tungod kay gihatagan og kinabuhi ang pasyon ni Hesukristo pinaagi sa street play. Ang maong pasundayag gilangkoban sa mokabat 300 ka mga boluntaryo nga magdudula o Lumadnong Magdudula sa Medina (Lumagmed) nga moabot ngadto sa lima ka oras nga pasundayag.
3. Sipaka Heights- Ang misibay nga bukid nga masaksihan sa lungsod sa Talisayan Misamis Oriental ang hinay-hinay na nga naila alang sa pagpamalandong panahon sa Semana Santa. Niaging tuig moabot ngadto sa 22,000 ka mga bisita ang mitungas niini. Adunay istasyon sa cross paingon sa ibabaw nga bahin ug makahugot ginhawa ang kapatsada sa talan-awon tungod kay malantawan ang kamalinawon sa dagat, kasikbit nga mga lugar ug ang silingang isla sa Camiguin.
4. Birhen sa Lourdes- Usa ka mirakulosong estatwa sa Birhen sa Lourdes ang mahimong bisitahon sa lungsod sa Binuangan, Misamis Oriental. Bisan ang tubod sa tubig nga miguwa tupad sa simbahan niini giingong lakip nga mirakuloso. Matag kapistahan niini ug adunay mobisita mahimo nga magpatunob sa Birhen diin nagpasabot nga ang rebolto sa mahal nga birhen ipatunob diha sa imong ulo.
5. Christ The King Statue- Ang 60 foot nga estatwa sa Christ The King ang makita sa siyudad sa Gingoog Misamis Oriental. Taliwala wala pa natapos ang katukoran niini ug giingong anaa pa sa 60 porsiyento apan bukas na kini sa bout mobisita sa lugar alang sai lang mga pag-ampo karong panahona. Niadtong bulan sa Septiyembre 2017 gisugdan kini nga proyekto.
6. Our Lady of Fatima- Mabisita ang 50-foot statue sa Our Lady of Fatima sa Barangay Sambulawan lungsod sa Laguindingan. Gadagsaon kini sa katawhan hilabina ning Semana Santa. Ang proyekto nakumpleto niadtong tuig 2014 sa Our Lady of Fatima Prayer Group nga nakabasi sa New South Wales, Australia. Sayon lang kining mahapitan tungod kay doul lang sa Laguindingan Airport.