WALO ka mga opisyal sa mga barangay sa lalawigan sa Sugbo ang nalambigit sa ginadili nga drugas, butyag ni Ivy Durano-Meca, pangu sa Cebu Provincial Anti-Drug Abuse Office.
Siya nikompirmar usab nga sobra sa 50 ka mga pulis ang gireklamo nga nalambigit usab sa kalihokan sa illegal drugs.
“Daghan gyud kaayo, kasagaran gyud namo madawat gyud complaints gyud in regards to police officers protecting, nagpangayoan, mga drug lord. Well, I think PNP knows that as well,” pahayag sa kanhi provincial board member.
Si Meca wa mohingan sa mga barangay diin nangalagad ang mga opisyal ug unsa ang ilang gihuptan nga mga posisyon.
Matod niya ang mao nga mga opisyal nalambigit isip mga protector, pushers ug tiggamitan.
Samtang, iyang nakita nga duna nay gibuhat ang kadagkuan sa kapulisan sa Sugbo sa mga pulis nga gidudahan nalambigit sa illegal drugs diin ang uban kay gipangrelibohan sa puwesto.
Siya nidugang ang ubang impormasyon bahin niini personal nga gipahibawo niya samtang ang uban pinaagi sa social media, sa iyang Facebook account.
Ang impormasyon nga ilang nadawat gipaabot nila ngadto sa Cebu Provincial Police Office aron maoy mohimo og aksyon ug pakisusi.
Si Meca namulong nga mahinungdanon ang social media sa kasamtangang panahon nga padangatan sa mga confidential nga impormasyon bahin sa gidiling druga.