USA ka bana ang nagpatala sa kapulisan sa Tugbok Police Station human iyang nasayran nga wala diay mi-abroad ang iyang asawa kay nabuntis ug mipuyo sa balay sa laing lalaki.
Adlaw nga Lunes, Disyembre 12, nagpatabang sa kapulisan ang bana nga si Mario (bansagon gitago sa SuperBalita), 36, nagpuyo sa Barangay Tugbok Proper, dakbayan sa Davao.
Sa impormasyon nga nakalap sa SunStar SuperBalita gikan sa kapulisan, giingong nagsagol ang kasuko ug kaguol ni Mario human iyang nasayran nga nabuntisan sa laing lalaki ang iyang asawa nga si Catherine, 32.
Sumala ni Mario nga niadtong Enero 8, nananghid kaniya ang iyang asawa nga moadto sa Manila aron i-proseso ang mga papeles para sa abroad.
Miuli kini sa Davao City ug mibalik na sab pagka Hulyo 6, kinsa nagpahibalo nga niadtong bulan sa Septiyembre, magpa-medical na siya ug molarga na sa abroad.
Nagtuo ang bana nga milarga na, apan natahap siya dihang di na niya makontak ang cellphone sa asawa.
Oktubre 16, nanawag sa bana ang agency sa Manila aron maningil sa bayad sa proseso sa papeles gumikan di kalarga ang iyang asawa kay giingong nabuntis.
Dihang nagsige'g kontak ang bana, higayong mitingog ang cellphone, apan di kini motubag sa tawag.
Niadtong Lunes lamang, daw nahugno ang kalibutan sa bana dihang nakadawat kini'g mensahe sa cellphone nga di na kauli ang iyang asawa kay nabuntis na kini sa laing lalaki.
Walay nahimo ang nasampit nga bana, iya nalang gipatala sa kapulisan ang maong hitabo ug namasin nga balikon siya sa iyang asawa.