DIGOS CITY -- Suwerteng wa maantimano ang usa ka abogada ug iyang kauban human gipamusil sa de-motorsiklong mamumuno alas 2:30 sa hapon, Martes.
Ang insidente nahitabo sa dalang Super Highway, Barangay Aplaya, ning dakbayan, duol sa buhatan sa Department of Agrarian Reform (DAR).
Ang kapulisan nag-ila sa biktima nga mao sila si Abogada Vivian Garen Rubia, 50, molupyo sa mga kanto sa dalang 0230 Del Pilar ug Diego Silang, sakop sa Barangay Zone 1 ug Lorna Ondangan.
Subay sa inisyal nga imbestigasyon sa Digos City Police Office (DCPO), nasayran nga gimaneho ni Rubia ang iyang Nissan Selfie nga sakyanan aron motambong og hearing sa DAR apan kalit lang nga nibutho ang duha ka wa mailhing suspek nga nagsakay og kolor blue nga Honda XRM.
Sumala ni PO3 Joie Pansan, imbestigador sa DCPO, hayan gisundan sa mga kriminal ang sakyanan sa abogada ug dihang natungod sa sakyanan niini, kalit nihulbot og mubo nga matang sa armas ang nag-angkas sa motor dayon namusil kanila.
Ang biktima gihulagway ni Pansan nga naigo sa ibabaw ug walang bahin sa dughan apan nakahimo pa kini pagpadagan padung sa Digos City Medical Center (MCDC) aron matambalan.
Samtang ang kauban niining si Ondangan paspas nga naka-ambak ug nidagan palayo sa sakyanan diin gisuwayan sab kini og pusil sa mga mamumuno apan suwerteng wa maigo.
Matud ni Pansan naigo sab sa saag nga bala ang ligid usa ka nakaparadang Montero sa tindahan ni Dodong Sarona.
Hinuon, gitataw sa mga nag-atimang doktor nga luwas na sa makuyaw nga kahimtang si Rubia.
Gilayong mihimo og imbestigasyon ang mga sakop sa Scene of the Crime Operatives ug narekober nila sa nahitaboan sa krimen ang duha ka mga basiyong bala sa kalibre .45 pistola.
Mga nakakita sa insidente nagbutyag nga abtik nakasibat ang mga suspek una pa miabot ang mirespondeng kapulisan.
Di pa masulti sa DCPO kinsa ang mga kriminal apan hayan adunay kalabutan sa trabaho sa abogada ang motibo sa insidente.
Mihimo na ang DCPO og lawom nga imbestigasyon aron matugkad ang hinungdan sa pagpamusil ug mailhan ang nagpaluyo niini.