Abuyog mobalik na og salmot sa Sinulog human mipalta

HUMAN sila makapalta sa pag-apil sa Sinulog grand parade sud sa pipila ka tuig tungod sa ilang pagkaigo sa bagyong Yolanda, ang Abuyog, Leyte nga sud na sa pipila ka higayon nga nakadaug, mosalmot na pagbalik.

Gikan sa sunod-sunod nga impresibong pasundayag sa Abuyog Festival sa mga mia­ging tuig, nagkanayon nga a­dunay silay lahi nga estratehiya nga giandam karong tuiga.

Si Jose Marie Jamili, usa sa mga dance master, niingon nga itandi sa nangagi nilang pag-apil, dako og kausaban ang ilang pamaagi karon maong angay atangan.

“Amo gyud ni gipangandaman kay tungod lage kuno sa giingon nga sa pagbabalik sa Abuyog,” matod ni Jamili.

Pangandam

Ang ilang konsepto gibase sa “Bee’s life cycle”.

Matod ni Jamili nga gi-banabana nga naa sa P5 mil­yones ang budget nga ilang giandam, apil na ang tanang personal services, costumes, production ug uban pa.

Ang choreographer nga si Romero “Titong” Paladica nibutyag sa iyang mga kasinatian sa pagdala sa mga dancers.

“Pinaka struggle gyud ang kanang mag practice mi kay magsige og ulan unya halos sa mga performers kay kinahanglan pa sila molabang og baha aron lang makaabot sa praktisan”, matod ni Titing.

Apan nagtuo siyang gikaluy-an sa Balaang Bata, gihatagan gihapon ang mga performer og maayong lawas aron magpadayon sa praktis.

Wa sab gipasagdan sa mga LGU og atiman ang mga performers ug ihatod pa sa isig balay ang mga bata bisan kon naa pa sa bukid nagpuyo.

Naa sa 110 ang mga perfor­mers ug apil na ani ang Buyog, special cast ug dancers.

Sila si Mayor Lemuel Gin Tra­ya ug Bise-Mayor Emmanuel L. Gacis mga deboto kang Senior Santo Niño maong gustong ma­ngapil sa kasaulogan.

“Ang among mayor ug vice mayor, panata na gyud na nila nga ganahan sila moapil gyud sa Sinulog. Moapil man gani sila didto sa among provinces, how much more nga diri gyud national?”, dugang ni Jamili.

Samtang, ang pag-apil sa contingent sa Panglao, Bohol gitumong isip halad, di aron modaug sa dance competition.

Si Marvin Jaye Bantigue, usa sa choreographer sa Panglao, nagkanayon nga gipangandam nila pag-ayo ang pagsayaw balik atol sa Sinulog 2018 aron i­pakita ang ilang dakong pasalamat ngadto kang Snr. Sto. Nino.

ALA Romeo and Juliet

Siya niingon nga ilang gipanindot ang ilang dance story ug anaay twist, lakip na sa ilang konsepto.

Usa ka lalake nga kabus nahigugma ngadto sa usa ka adunahan nga Cebuana nga sama ra sa Romeo and Juliet.

Kon unsa ang kinatibuk-ang estorya, matod niya, maayong atangan ang ilang performance.

Nibutyag sab si Bantigue nga di alang sa kompetisyon ang ilang pag-apil, apan isip kini pagpakita og pagsalig kang Snr. Sto. Nino.

Niingon sab siya nga ang gusto lang sa ilang lungsod, uban sa suporta ni Panglao Mayor Leonila Montero ang mohalad ngadto sa Balaang Bata ug wa sila nag-apas sa kadaugan.

Nipadayag sab si Bantigue nga aduna sila’y kaugalingong selebrasyon sa Sinulog ngadto sa Panglao nga kanunay suportahan sa mga Panglaonon.

“Wala mi nag-apas sa kwarta. Ang amoa lang is pure halad. Pero if ever makadaug maayo”, ingon pa ni Bantigue isip choreographer. (Mary Diane Salasayo, Michelle Anne Obor, USJ-R Interns)