MGA mamumuo sa tanang departamento sa Sun.Star Publishing Inc. malipayon nga nag beach outing sa 'Employees Day' sa kompanya atol sa paghandom sa ika-129 Labor Day, Biyernes didto sa Marex Beach Resort, Babak District, Island Garden City of Samal (Igacos).
Ang gimbuhaton kabahin sa tinuig nga programa sa SunStar Davao ug sa igsuon niining mantalaan Superbalita, aron pagmintinar sa maayo nga relasyon sa mga tawo nga nagserbisyo nga maoy tulay aron mapatik ang mga lab-as nga balita, husto nga impormasyon ug kalingawan sa mga panid sa nag-unang inadlaw nga mantalaan nga nagsukad ning siyudad.
Sayo sa buntag, mibiya ang mga trabahante sakay sa bus gikan sa buhatan sa SunStar Davao, dalang Jacinto, aron motabok sa lawod dala ang kahinam nga moapil sa mga giandam nga kalingawan, padula ug salu-salo isip usa ka dakong pamilya nga magkatapok lang ang tanan panahon nga dunay mga okasyon.
Wa damha nga ang gigahin nga usa ka adlaw sa kompanya, maghatag og dugang maayong relasyon sa tanang empleyado.
Bisan sa kataas sa linya sa mga sakyanan nga mosakay sa barge, naa gihapon ang kahinam nga makita sa mga dagway sa mga empleyado di lang sa maong buhatan apan lakip na sa uban kay holiday man.
Nahimong sadya ug halandumon ang panag-uban sa mga mamumuo bisan mubo lang ang panahon uban kang SunStar Davao General Manager Tessie Me Alcoriza ug mga pangulo sa mga departamento diin gipadaplin una ang mga gikuptan nga tahas sa trabaho ug nag-uban sa samang lebel isip mamumuo.
Nagbuhagay sab ang mga premyo ug mga raffle items diin tulo sa mga major prizes mao ang mga cellphone nga nakuha ni Bing Panio sa Accounting department.
Ug siyempre ang di malimtan mao ang pagbisita sa grupo sa Vanishing Island sa dapit diin ang tanan nagtampisaw sa tin-aw nga tubig-dagat.
Mapasalamaton ang tanang trabahante sa SunStar Davao sa gipaambit nga pagtagad sa mga tagdumala sa kompanya gumikan maingon nga di kabugtian og kantidad ang tiunay nga panerbisyo. (Seth Delos Reyes)