GIHIMAKAK sa asawa sa usa ka retiradong polis ang mga alegasyon sa NPA hinungdan nga gipatay kini niadtong Lunes sa hapon sa Barangay Cabubuhan lungsod sa Magsaysay, Misamis Oriental.
Giila ang biktima nga si Senior Police Officer 4 Dioscoro Capirig, kanhi hepe sa Magsaysay Police Station kinsa nahimo usab nga deputy sa Talisayan Police Station. Giingong nagretiro ang biktima niagi pa nga tuig.
Ang asawa niining si Evelyn nakurat kaayo dihang nasayran nga hinimoan kini sa walhong pundok ug dili makatoo sa rason nganong gipatay ang iyang bana.
Usa sa gibutyag sa NPA pinaagi sa ilang tigpamaba nga si Allan Juanito gikan sa North Central Mindanao Regional Operations Command nga gilikida si Capirig tungod sa giingong dili maayong kalihokan sama sa pagpang-salvage, pagpanukmag, ug pagamit sa ginadili nga druga.
Hugot nga gihimakak ni Evelyn ang alegasyon tungod kay daw dili kini hinimoan sa iyang bana ug gani dihang misirbisyo pa kini isip polis maayo ang iyang pagpadagan tungod kay buot gyod niining badlungon ang mga badlungon sa katilingban.
Gikasakit usab niini ang alegasyon nga tigpayuhot kini ug druga tungod kay mismong iyang bana daw ang gapangulo sa pagpangsikop sa mga nalambigit niini ug gani sa pagpatuman sa insakto wala kini giisip nga paryente.
Hinuon giangkon ni Evelyn nga dili niya ilimod nga adunay napasakitan ang iyang bana apan sa iya lamang mga sakop kung nakita niini nga nagbinuang.
Matud ni Evelyn nga sakit kaayo alang kaniya nga imbes karon nga niretiro na iyang bana ug iya na unta kining makauban sa tanang oras gipatay na hinuon. Matud niini nga niadtong nagtrabaho pa iyang bana pokos kini sa iyang trabaho ug iyang gisabot nga gamay na lamang kaayo og oras sa iyang pamilya.
Panawagan ni Evelyn sa kapolisan nga miimbestigar sa kaso sa iyang bana nga unta mapahamtangan og kaso ang suspetsado nga mipatay sa iyang bana.
Kahinumduman nga gipatay si Capirig dihang gianhaan kini sa upat ka mga lalaki sa puloy-anan niini.
Gisaysay ni Evelyn nga unang nagpatuong mga kostumer ang mga suspetsado ug nikanta sa ilang videokihan apan nakurat siya dihang nakigsulti pa sa iyang bana ug pangayuon ang armas.
Gani milangtod pa sa pila ka oras ang panagsulti sa biktima ug sa mga suspetsado tungod kay unang gihimakak sa biktima nga wala kini gitagoan nga armas.
Dugang ni Evelyn nga nadungog pa niya nga niingon ang suspetsado nga dili magbakak kung dili gusto niini mamatay. Apan dihang nasayran sa mga suspetsado nga adunay garan ug kalibre 22 deretsong gipusil ang biktima diin nakaangkon kini og pito ka samad pinusilan sa lawas. SVB