NAKUHAAN og 5.8 gramo sa shabu ang usa ka babaye pinaagi sa drug bust operation niadtong Lunes, Disyembre 12, alas 8 sa gabii sa Capt. Vicente Roa, Barangay 38, dakbayan sa Cagayan de Oro.
Nagtingkagol sa Maharlika Detention Cell si Inoray Cabugatan, 45, minyo ug residente sa Pinikitan, Barangay Camaman-an ning dakbayan.
Sa nahipos nga report gikan sa Police Station 2 sa Cogon, gikabutyag nga nagpahigayon ang mga sakop sa Cagayan de Oro City Police Office City Anti-Illegal Drug Special Operation Task Group Focus TM4 inubanan sa tinugyanan sa Police Station 2 sa Cogon og drug bust hinungdan sa malampusong pagkasikop sa suspetsado.
Napalitan ang suspek og usa ka pakete sa gituohang shabu baylo sa P300 hinungdan nga malampuson kining nasikop.
Nakuha usab sa posisyon niini ang mokabat sa 5.8 gramo sa shabu nga gibana-banang nagkantidad og P15 mil.
Sa pagkakaron, ang maong suspek nagtingkagol na sa bilanggoan alang sa pagpaabot sa tukmang kaso nga ipahamtang batok kaniya.