DUNAY samad sa ulo nga napalgan ang usa ka babaye nga wala nay kinabuhi sa Barangay Waterfalls, lungsod sa Balingasag, Misamis Oriental.
Mga alas 2:30 ang takna sa kahapunon niadtong adlawng Huwebes nakita ang wala pay identipikasyon nga babaye sa basakan nga bahin sa maong dapit.
Sa interbyu sa SunStar SuperBalita kang Police Officer 1 Kiera Aquilam gibutyag niini nga nagpangidaron ang biktima og 50 anyos pataas ug gidudahan nga adunay deperensya sa pangisip.
Ang mga residente sa dapit nagbutyag nga bag-o lang sab nila namatikdan ang maong babaye ug kon ila kining pangutan-on moingon lang kini nga taga Lanao del Sur apan dili mosulti sa iyang pangalan.
Dako ang pagduda sa kapolisan nga natripan kini ug giposposan sa kahoy ang ulo hinungdan sa iyang kamatayon.
Gibutyag sab niini nga i otopsiya kini aron gyod masuta ang tinoud nga rason sa iyang kamatayon.
Kon adunay mga pamilyang nawad-an og sakop moreport lamang sa ilang buhatan.
Ang patayng lawas ning panahona gidala na sa punerarya sa maong dakbayan.