KAWANING babaye sa Talisay City Hall nireklamo sa laing kawani nga nadistino sa Engineering Division sa dihang gidala siya sa Queensland Motel human sa ilang sanitary inspection, apan nakahigayon siya sa paggawas sa compound sa motel.
Ang babaye nipasangil usab nga gihagkan siya sa maong hamtong nga lalake una pa gikalitan og liko ang motorsiklo nga iyang gisakyan ngadto sa motel.
Si Ana (di tinuod nga pangan), nadistino city health office, batan-on pa, apan buwag sa iyang bana, nireklamo.
Ang gireklamo mao si Mario (di tinuod nga ngan), kawani sa city engineering office, minyo, hingkod, hapit na moretiro sa trabaho.
Sigun sa sa affidavit nga gipirmahan ni Ana nga niadtong Marso 8 gitawgan siya ni Mario aron mohimog joint inspection ang Office of the Building Official ug Sanitary Office alang sa usa ka quill raising farm sa Barangay Linao.
Pasado alas 10 sa buntag, nibiya sila sa city hall paingon sa dapit sakay sa motorsiklo ni Mario.
Nitambong sila sa session alang sa usa ka reklamo sa himuanan og uling sa mao gihapon nga barangay.
Human niini, nitanyag si Mario nga ilang adtuon ang dapit nga gireklamo nga ulingan.
Human sa ilang pag-inspection, nitanyag si Mario nga magpabugnaw sila ug maniudto, apan nibalibad si Ana nga wala siyay kuwarta ug mobalik siya sa city hall aron adto mainudto.
Apan nitanyag si Mario nga siya ang mobayad ug adto sila sa Queensland mangaon, apan iyang gibalibaran ug didto nalang sila nangaon sa mall sa Barangay Lawaan.
Human sila nangaon, paingon na sila mosakay og balik sa motorsiklo, kalit siyang giagbayan ug dayog hawok sa iyang aping, apan iyang nawakli.
Samtang nagdagan ang motorsiklo ug nahatungod sa Queensland Motel sa Barangay Lawaan 1, kalit niliko si Mario bisan pa sa iyang paghangyo nga di sila mosulod.
Iyang giasoy nga samtang nagkig-estorya si Mario sa roomboy, nakahigayon siya sa paglakaw gawas sa compound ug giapas siya sa suspek.
Nihangyo kini kaniya nga mosakay og balik aron mamalik sila sa city hall.
Sa dihang miabot sila sa city hall, si Ana nisumbong sa iyang labaw nga si Dr. Allan Alanzado, ug niadtong Lunes sa miaging semena iyang gisumbong ngadto sa labaw ni Mario nga si Engr. Gamaliel Vicente Jr. ang hitabo.
Matod ni Vicente nga human niya nadungog ang reklamo sa babaye, iya kining gitambagan nga mopasakag reklamo ngadto sa Human Resource Department.
Nagkanayon si Vicente nga di niya tabunan ug panalipdan ang iyang sakop kon makasala.
Iya na usab nga giestoryahan ang iyang sakop ug niingon nga igo lang unta siya mopalit og softdrink.
Iya kining gihulagway nga tarong ug una pang higayon nga nakadawat og reklamo samtang opisyal ang mao nilang lakaw niadtong higayona.
Samtang si Emely Cabrera, pangulo sa HRD, nibutyag nga nakadawat na sila sa maong reklamo ug gikatakda nang ipailawom sa imbestigasyon sa committee on discipline and investigation.