Bañoc: Ang miimbestigar ang giimbestigar

UNANG miimbestigar si Senador Leila De Lima sa gikataho nga extrajudicial killings sa nasud. Apan siya nga miimbestigar mao na karon ang giimbestigar tungod sa alegasyon nga nagdawatan ug payola sa mga drug lord sa New Bilibid Prisons (NBP).

Sa miaging semana, nagdahom si De Lima nga maka-score siya human miatubang sa Senado si Edgar Matobato, ang nangangkon nga orihinal nga miyembro sa liquidation squad ni kanhi Davao City Mayor ug karon Presidente Rodrigo Duterte.

Apan naunay ug kapalpal si De Lima sa mao nga testigo gumikan sa nagkasukwahi ug nagkabalit-ad nga mga testimoniya.

Gikorehean mismo ni De Lima si Matobato sa pagtug-an ug sayop nga petsa sa dihang ang nahiuna nga kanhi opisyal sa Commission on Human Rights (CHR) mihimo ug pakisusi sa mga mass graves sa mga biktima sa salvage. Klarong gigiyahan ni De Lima si Matobato sa dihang iyang gipangutana kon unsay iyang nahibaw-an sa pagkamatay sa kanhi magsisibya nga si Jun Pala.

Sa miaging Lunes, wala damha nga na-knock-out siya gikan sa Pambansang Kamao nga si Senador Manny Pacquiao. Si Pacquaio ang miisa sa motion aron ibakante ang chairmanship ug membership sa Senate Committee on Justice nga kanhi gipanguluhan ni De Lima.

Misamot nga maglisod nag panagang si De Lima sa mga akusasyon. Kagahapon, ang Committee on Justice sa Kamara pinanguluhan ni Oriental Mindoro Congressman Reynaldo Umali mihimo sa ilang independenteng inquiry sa naghitak nga illegal nga drugas sa NBP.

Matud ni Justice Secretary Vitaliano Aguirre II, labing menus 30 ka mga penereso nga naglangkob sa mga drug lord sa NBP ang mosaksi nga nagdawatan si De Lima ug payola sa mga drug lord sa presohan.

Apil sa motestigo batok ni De Lima mao ang drug lord sa NBP nga si Herbert Colangco. Unsa man kahay depensa ni De Lima kon personal na siyang itudlo ni Colangco ug sa ubang mga drug lord sa NBP?

Gibalik-balik ug himakak ni De Lima ang aku­sasyon. Kini ang hinungdan nga giimbitar sa Kamara si De Lima aron personal nga motubag sa pangutana sa mga Kongresista.

Apan misaad si De Lima nga dili siya motambong sa inquiry. Siya nga agresibo kaayong miimbestigar mao na karon ang mibalibad sa pag-atubang sa imbestigasyon sa Kamara.

Dili ba oportunidad na unta ni De Lima nga matubag ug sakto kon nganong siya pa ang Justice Secretary wala siya kapakgang sa naghitak nga drugas sa NBP?

Dili kalikayan nga motumaw ang pagduda sa daghang mga magbubuhis nga may personal nga interes si De Lima sa iyang pagsupak sa hugot ug inisog nga kampanya ni Duterte batok sa illegal nga drugas.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph