Bañoc: Imbestigasyon sa UN?

GIHAGIT ni Presidente Rodrigo Duterte ang United Nations (UN) nga mopadala ug mga imbestigador nganhi sa Pilipinas.

Ang UN ang apil nga nakasaway sa pagpatay sa mga gikatahapang nalambigit sa illegal nga drugas. Sa talaan sa Philippine National Police (PNP), sobra sa 3,000 ka mga gikatahapang durugista ang natumba sulod sa duha ka buwan pa lang nga paglingkod ni Duterte isip pangulo sa nasud.

Apan daw dili makatarunganon nga ang tanang mga napatay adto ibasol ngadto sa pamunuan ni Duterte. Ang hepe sa kapolisan sa nasud nga si Heneral Ronald ‘‘Bato’’ De La Rosa miangkon nga sobra sa 1,000 ka mga durugista ang napatay sa kapolisan atol sa lehitimo nga operasyon.

Kon mosukol ang durugista, dili maayo nga magpaposil lang ang mga polis. Kinahanglang makamao ang mga polis sa pagdepensa sa ilang kinabuhi batok sa mga bangis nga kriminal. Ang ubang mga napatay gidudahang gitumba sa mga vigilanteng grupo ug ang uban giunay ug patay sa ilang kauban sa sindikato.

Sukad masukad sa kasaysayan sa Pilipinas, si Duterte pa lang ang nakahimo ug hugot nga kampanya batok sa drugas diin sa kabag-o sa iyang admi­nistrasyon, sobra sa 700,000 nga mga durugista ang mitahan ug 90% ang pagkunhod sa supply sa illegal nga drugas.

Matod ni Duterte, ang suliran sa drugas nanginahanglan ug isog nga liderato nga kayang modesiplina ngadto sa mga durugista. Sa iyang istorya nanginahanglan kita ug lider nga dili mahadlok nga mopatay sa mga bangis nga kriminal.

Pero ug duna may wala kaangay sa pamaagi ni Duterte, naa pa ba kahay laing mas epektibong pamaagi sa pagsumpo sa illegal nga drugas? Matod sa Philippine Drug Enforcement Agency (PDEA), miabot na ug mga 4 milyones ka mga Pilipino sa tibuok nasud ang adis-adis. Ang ilang kadaghanon mapun-an pa ug dili mahatagan sa administrasyon ug dinaliang sulbad sa pagpakgang sa mga nagpayuhot sa drugas.

Tinuod nga ang Pilipinas sakop sa UN ug mipirma ug mga kasabotan sa pagpanalipod sa tawhanong katungod. Ang hugot nga kampanya ni Duterte batok sa drugas kabahin sa iyang gipanumpaan sa pagpanalipod sa katawhan batok sa mga durugista nga sabog ang huna-huna sa paghimo ug krimen.

Angayang motahod ang UN sa pamaagi sa pagdumala ni Duterte isip pangulo sa Pilipinas nga may soberenya ug may independenteng gobyerno.

u2018‘The Philippines is a democratic and republican State. Sovereignty resides in the people and all government authority emanates from them’’ (Section 1, Article II, 1987 Constitution).

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph