MIATUBANG sa Senado niadtong Huwebes ang nagpailang kanhi miyembro sa Davao Death Squad (DDS) ug mitestigo sa gitumbok nga mga pagpatay ubos sa mando ni Presidente Rodrigo Duterte ug sa iyang anak nga si Paolo.
Siya mao si Edgar Matobato, 57, nga nagpahibawo nga apil sa orihinal nga miyembro sa liquidation squad ni Duterte niadtong 1990's nga unang nanganlan ug Lambada Boys.
Apan may labing menus dul-an sa 20 ka mga buslot sa iyang pamahayag.
Apil niini mao nga kanhi siya miyembro sa Civilian Armed Forces Geographical Unit (CAFGU).
Apan ang spokesman sa Philippine Army nga si Col. Benjamin Jao miingon nga sa ilang listahan dili nila sakop si Matobato, hinuon kanhi kini miyembro sa New People's Army (NPA).
Matod ni Matobato nga niadtong tuig 2010, sa mando ni Duterte ilang gipatay ang mga bodyguards ni kanhi House Speaker Prospero Nograles. Apan ang kampo ni Nograles namahayag nga wala silay bodyguard nga gipatay.
Iyang gitug-an nga niadtong tuig 2002, usa ka terorista ang ilang gipatay ug gidala sa buhatan sa Presidential Anti-Organized Crime Task Force (PAOCTF).
Apan si kanhi PNP Chief ug karon Senador Ping Lacson niingon nga ang PAOCTF nawagtang niadto pang tuig 2001.
Si Matobato namahayag nga sa tuig 2003, si Senador Leila De Lima nga kanhi pangulo sa Commission on Human Rights (CHR) dunay gihimong pakisusi pinaagi sa pagkawot sa mass graves sa mga gikatahon gipa-salvage ni Duterte.
Apan gikorehian siya ni De Lima nga ang mao nga panghitabo dili 2003 apan sa tuig 2009.
Nitug-an si Matobato nga iyang higala ang nagdala kaniya sa Senado aron motestigo sa gipatawag nga joint inquiry pinangulohan nila ni De Lima ug Lacson.
Apan wala siya kaila sa iyang higala sa dihang gipangutan ni Senador Tito Sotto.
Ang mga nahisgotan ang kabahin lang sa mga nabantayang buslot sa pamahayag ni Matobato hinungdan nga nakuwestiyon ang iyang kredibilidad isip testigo.
Sa mga kutay sa kaso nga nahukman sa Korte Suprema, ang kredibilidad sa testigo mahinungdanon aron magamit nga ebedensya ang iyang testimoniya sa hukmanan. Apil sa lig-ong basehanan sa hukmanan aron ilhon nga dunay kredibilidad ang testigo sa pamahayag base sa iyang personal nga nasinati ug nahibaw-an sa paghimo sa krimen (People vs. Baquiran, 20 SCRA 451).
Ang Korte Suprema niingon nga kadudahan ang kredibilidad sa testigo kon sa hataas nga panahon siya nagpakahilom sa pagtug-an ngadto sa mga awtoridad sa nasaksihan nga krimen (People vs. Beltran, 61 SCRA 156).