ADUNAY 18 ka mga pulis ug usa ka sakop sa Philippine Drug Enforcement Agency (PDEA 7) ang nanganlan karon nga nagdawatan og payola gikan sa miangkon nga drug lord nga si Franz Sabalones.
Si Sabalones kinsa taud-taod nang gikustodiya sa Kampo Crame human siya mitahan ang boluntaryong misuka sa giingong mga drug protectors sa iyang negosyo sa illegal nga drugas.
Nanganlan ni Sabalones ang usa ka ahente sa PDEA 7 nga si Joel Bersales. Ang nakadugang sa kontrobersiya kay dunay tulo ka mga koronel sa kapolisan ang naapil nga mao sila si Supt. Rex Derilo, kanhi hepe sa Regional Intelligence Division (RID 7), Supt. George Ylanan, kanhi hepe sa Regional Special Operations Group (RSOG 7) ug ang kanhi hepe sa kapulisan sa Carcar nga si Supt. Teodolfo Manatad.
Sila gipaubos karon ug imbestigasyon sa uluhang buhatan sa Criminal Investigation and Detection Group (CIDG).
Sa habig nilang Derilo ug Ylanan, ilang gihimakak ang akusasyon ni Sabalones. Ila kanang katungod nga manalipod sa ilang kaugalingon.
Si Sabalones ang giila sa kapolisan nga ikaduhang bigtime drug lord sa Central Visayas. Kaya niyang modispatsar ug kadaghanon sa drugas sama sa napatay nga si Jeffrey Diaz alias Jaguar ug ang napreso karon sa Cebu Provincial Detention and Rehabilitation Center (CPDRC) nga si Alvaro Alvaro alias Barok.
Tunog ang pangalan nila ni Derilo ug Ylanan sa Sugbo kay aktibo sila niadto sa kampanya batok sa illegal nga drugas. Sila ang nangulo sa pagkapatay ni Jaguar didto sa kaulohan.
Ning ila karon nga kontrobersiya, dili kalikayan ang pagduda sa mga tawo sa klarong hinungdan sa pagpatay ni Jaguar. Tinuod kaha nga misukol si Jaguar o gituyo siya pagpatay aron ang iyang ba-ba hingpit nga motak-om?
Dili pa igo ang testimoniya lang ni Sabalones aron ilhon nga tinuod ang akusasyon batok nilang Derilo, Ylanan ug kaubanan nga apil sa kontrobersiya. Kinahanglan nga mas palapdan pa sa CIDG ang imbestigasyon aron makutkot ang kamatuoran.
Gawas ni Sabalones, mas maayo nga mosuka usab si Barok sa pangalan sa iyang mga drug protectors. Sukad nga mitahan siya ngadto sa National Bureau of Investigation (NBI 7), hilom pas bao ang iyang ba-ba.
Sa dihang milingkod si Presidente Rodrigo Duterte, nag-anam-anam ug kabulgar ang mga dagkong gaway sa illegal nga drugas. Ang pinakabag-ong nabolgar mao ang pagtingog sa mga drug lord sa New Bilibid Prisons (NBP) ug personal nga mitudlo kang Justice Secretary Leila De Lima nga nagdawatan ug payola gikan sa drugas.
Lawom ug dili bastabasta tugkaron ang suliran karon sa illegal nga drugas. Maayo nga hatagan nato ug kagawasan si Duterte nga mohimo ug programa aron panalipdan ang katawhan batok sa mga durugista. Apan kinahanglan palawman pa usab ang mga imbestigasyon.