Bañoc: Mitugpa sa prisuhan tungod sa bomb joke

USA ka babaye ang gidakop sa kapo­lisan niadtong Biyernes sa miaging semana human nangomedya nga dunay bomba sa iyang bag.

Didto tugpa sa prisohan ang 37 anyos nga si Jasmin Sala, taga Barangay Tipolo, dakbayan sa Mandaue human giseryuso sa guwardiya sa usa ka mall ang iyang bomb joke.

Si Sala naghilak ug nagpakiluoy sa kapolisan nga dili siya pasakaan ug kaso kay ang iya komedya ra. Apan ang kapolisan niingon nga bahala na ang piskaliya sa pagtimbang-timbang sa kaso batok ni Sala. Siya gipasakaan ug kaso kalapasan sa Presidential Decree (P.D.) 1727, usa ka balaod nga nagsilot sa mipakatap ug sayop nga inpormasyon sama pananglitan sa pagpanghadlok nga dunay bomba.

Ang mao nga balaod napasar niadto pang Oktobre 8, 1980 atol sa pamunuan ni kanhi Presidente Ferdinand Marcos. Ang mamatud-ang sad-an mapreso ug dili molapas sa 5 ka tuig o multa nga P40,000.

Dili pirmirong higayon nga dunay nangadakpan kay nangomedya nga may bomba. Sagad sa mga nadakpan mihimo og bomb joke sa sulod sa airport ug mga pantalan.

Apan ang bomb joke nga may tugbang nga silot base sa P.D. 1727 mahimo usab sa laing publikong lugar sama sa mall, merkado o uban pang lugar nga daghang tawo.

Nabantayan nga dunay mga tawo ang malipay kon makamugna ug kakuyaw sa uban. May higayon nga ang mga polis moresponde kay dunay botang nga gikatahapang bomba. Nagkatawa lang ang nagbinoang kay sagad mga papel  lang ug alambre ang sulod ug gituyo lang sa paghimo aron sa pagpanghadlok.

Kagahapon, gihandom ang ika 15 ka tuig nga anibersaryo sa terorismo didto sa Amerika nga mipatay ug dul-an sa 3,000 ka mga tawo diin ang mastermind mao ang international terrorist nga si Osama Bin Ladin.

Ning panahona, padayong nanghasi ang mga terorista nga mga kaalyado sa Islamic State of Iraq and Syria (ISIS). Padayong nakiggubat ang militar batok sa mga tero­ristang Abu Sayyaf. Bag-o pa lang nga dunay mga nangamatay sa mibuto nga bomba sa Davao City.

Busa, gamay lang nga istorya nga may bomba, natural nga reaksyon nga dunay makuratan. Dili angayan nga himuong komedya ang bomba. Makamugna kini ug kalisang sa katawhan ug makahasol sa atong mga awtoridad.

Ibotang nato sa saktong lugar ang komedya kay seryuso nga katungdanan ang pagpatuman sa kahapsay ug kalinaw. Unta, kakuhaan ug pagtulun-an sa uban ang mga nadakpan tungod sa bomb joke.

Dili na nato pun-an ang kabug-at sa trabaho sa atong mga alagad sa gobyerno sa pagbantay batok sa hulga sa siguridad. Timan-i nga ang bomb joke dili joke.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph