Bañoc: ‘State of national emergency on...’

GIPAUBOS na ni Presidente Rodrigo Duterte og state of national emergency ang tibuok Pilipinas. Kini aron sa dugang hugot sa pagpangandam batok sa terorismo.

Niadtong Lunes nga gi­pirmahan ni Duterte ang usa ka proclamation alang sa state of national emergency on account of lawless violence in Mindanao.”

Si Communications Assistant Secretary Kris Ablan niingon nga usa sa na­latid sa mao nga proklamas­yon mao ang pagmando ni Duterte ngadto sa kapulisan ug militar sa pagpakgang sa tanang matang sa lawless violence sa Mindanao ug pagpugong nga ang kagubot dili mahitabo sa laing lugar.

Una nang gipaubos ni Duterte og state of lawlessness ang tibuok nasud niadtong Sabado human sa nahitabo nga pagpambomba sa Davao City niadton Biyernes sa miaging semana.

Giklaro sa Malacañang nga ang state of lawlessness ug ang state of national emergency dili parehas sa martial law. Kini dili usab gamiton aron lapason sa militar ug kapolisan ang mga batakang katungod sa katawhan.

Si Presidential spokesman Ernesto Abella miingon nga ang proklamasyon ni Duterte nakabase sa batakang balaod nga ang Presidente isip Commander-In-Chief sa militar makamando sa kasundalohan aron sa pagpakgang sa lawless violence, invasion ug rebellion.

Adunay lawless violence sama sa terorismo diin ang mga responsable wala na motahod ug balaod. Ang invasion mao nga ang nasud sulngon o giyerahon sa laing nasud.

Ang rebellion mao ang klase sa insurhensya diin adunay pag-alsa atubangan sa publiko ginamit ang armas alang sa tuyo sa pagtalikod sa gobyerno (Section 134, Revised Penal Code).

Ang dakong basehanan ni Duterte sa pag-isyu ug state of lawless violence ug state of national emergency mao ang lawless violence. Ang binuhatan sa mga terorista nga namomba ug mipatay ug miangol sa daghang kinabuhi didto sa Davao makonsiderar nga lawless violence.

May mga niingon nga dakong insulto ni Duterte nga nalutsan ug terorista ug sa iya pa gyong teritoryo nga giila nga usa sa pinakaluwas nga puy-an nga siyudad sa tibuok kalibotan. May mga huna-huna usab nga basin ug ang gobiyerno ra maoy responsable sa pagpamomba sa Davao aron himuong basehanan ni Duterte sa pagdeklarar ug martial law.

Usahay, imbes tabangan nato ang nasud, momugna hinuon kita ug dili maayong istorya. Ang nahitabo sa Davao nagpasabot nga wala nay luwas karong panahona gikan sa mga terorista. Kon nalutsan sa mga terorista ang mga gamhanang nasud sama sa Amerika ug France, unsa na kaha ang Davao ug ang ubang mga dapit sa Pilipinas?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph