Barrita: Anti-Dynasty Law

SI Presidente Noynoy Aquino na mismo, sa iyang katapusang State of the Nation Address (Sona) niadtong miaging Lunes atubangan sa joint session sa Kongreso, ang miawhag sa mga magbabalaod nga panahon na nga ipasar ang Anti-Dynasty Law.

Apan basin kon kadtong iyang awhag bunga lang kadto sa iyang kalagot ni Bise Presidente Jojo Binay nga niingon nga “manhid” ug “palpak” ang iyang administrasyon. Ang pamilyang Binay maoy nagkontrolar sa syudad sa Makati sud na sa kapin sa duha ka dekada.

Unsa man giingon sa atong Batakang Balaod mahitungod sa political dynasty?

Ang Article II Section 26, 1987 Constitution nag-ingon, “The State shall guarantee equal access to opportunities for public service, and prohibit political dynasties as may be defined by law.”

Sa pag-ingon sa Batakang Balaod nga gidili ang mga political dynasty “as may be defined by law,” nagpasabot nga gitugyan ngadto sa Kongreso ang pagpanday og balaod nga mag-define kon unsa ang gitawag nga political dynasty. Apan 28 na lang ka tuig ang milabay human maratipikar ang atong Batakang Balaod, wa pa gihapon makapasar ang Kongreso sa Anti-Dynasty Law.

Mapasar kaha kini karon nga talisawop na ang administrasyon ni PNoy ug taliabot na ang kampanya alang sa sunod eleksyon? Hinumdumi baya nga ang politika sa Pilipinas gikontrolar lang sa kapin sa duha ka gatos ka pamilya.

Kon mapasar kini, mao na kini ang higayon nga kalimitahan ang pagkontrolar sa atong politika. Wa nay monopoliya sa maghupot sa gahum. Matuman na gyud ang giingon sa atong Batakang Balaod nga “equal access to opportunities for public service.” Kahatagan na ang uban sa kahigayonan nga mahimong konsehal, mayor, provincial board member, gobernador o kaha kongresista. Sa pagkakaron gud, mapuli-puli lang sa puwesto ang managsuon, amahan ug anak o kaha apo, bana ug asawa ug uban pang mga kaliwat.

Unsa may baruganan sa atong mga politiko dinhi sa Sugbo?

Si kanhi kongresista Eduardo Gullas sa unang distrito sa Sugbo niingon nga nipaluyo siya sa awhag ni Aquino apan nagduda siya nga mapasar ang maong ba­laod sa di ma mapupos ang termino ni Aquino sa 2016.

u00a0Si Kongresista Rodrigo “Bebot” Abellanosa sa habagtang bahin sa syudad sa Sugbo ug si Rep. Joseph Ace Durano sa ikalimang distrito sa lalawigan sa Sugbo nipaluyo sa pagpasar sa maong balaod apan lantugian pa sa mga magbabalaod ang definition sa political dynasty ug kon si kinsa ang tugutan sa pagdagan.

Ang gipaabot nga mahitabo mao nga tingali mapasar sa Kongreso ang usa ka Anti-Dynasty Law apan kanang ilang gitawag nga watered-down version. Sa sikwate pa na, layaw kaayo, nagdaghan lang ang tubig. Kay matawag nato nga usa ka political suicide alang sa mga pamilya nga naghupot karon sa gahom nga did-an ang ilang mga kabanay nga moapil sa politika o kaha maoy mohulip kanila.

(Ang atong paghisgut-hisgot mahitungod sa balaud madungog na matag karon ug unya sa mga tampo nga dunay punto legal ngadto sa tulomanon nga “Alang Kanimo Kapuso” nga gisibya  gikan sa ala-una ngadto sa alas dos sa hapon sa sibyaan DYSS Superadyo sa RGMA network.)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph