TULO ka mga manlalaban ang nahimong kontrobersyal kay nahilambigit sa gitawag nga usa ka “love triangle” nga sumala pa sa mga headlines sa mga pamantalaan, “Lawyers’ Triangle.” Ato na lang nga itugyan kini sa mga hukmanan kay duna na may mga kaso nga gipasaka. Ang atong hisgutan mao ang kalainan sa concubinage ug sa adultery, duha ka kaso nga pareho ra ang sinugdan, sexual infidelity, kon pagluib sa usa sa magtiayon.
Makahinumdom lang ta niadtong estorya mahitungod sa usa ka bana nga nagkuyog sa iyang kabit sud sa usa ka restaurant ug nasakpan sa iyang asawa. Sa dihang hapit na moulbo ang usa ka dakong iskandalo, nihunghong ang bana ngadto sa iyang asawa nga di kini masuko kay ang tanang mga mahalong alahas nga iyang gihatag kaniya, gikan sa iyang kabit. Nikalma ang asawa ug nilingkod na lang uban sa iyang bana ug sa iyang kabit. Pagkataud-taud niabot ang ilang silingan nga kuyog sab sa iyang kabit. Matod pas asawa, “Darling, mas guwapa ang ato no?”
Unsa man kining concubinage? Sumala pa sa sa Article 334, Revised Penal Code, “Concubinage is committed by any husband who shall keep a mistress in the conjugal dwelling, or, shall have sexual intercourse, under scandalous circumstances, with a woman who is not his wife, or shall cohabit with her in any other place.”
Unsa man usab ang adultery? Sumala pa sa Article 333, Revised Penal Code, “Adultery means the carnal relation between a married woman and a man who is not her husband, the latter knowing her to be married, even if the marriage be subsequently declared void.” Ang matag pakighilawas usa ka kaso sa adultery.
Karon, unsa man ang kalainan sa adultery ug concubinage?
Ang krimen nga adultery mahimo sa usa ka asawa nga makighilawas sa laing lalake nga di niya bana. Ang asawa ug ang iyang kabit kinahanglan nga ikiha. Samtang ang concubinage mahimo sa usa ka bana nga dunay kabit. Ang bana ug ang kabit kinahanglang ikiha.
Ang pruweba sa pakighilawas igo na sa pagkonbikto sa kasong adultery, apan sa concubinage, kinahanglan nga pruwebahon nga ang pakighilawas gihimo sa iskandalusong paagi o kaha ang bana nakig-ipon pagpuyo sa iyang kabit sa panimalay sa magtiayon o sa laing dapit.
Ang gireklamohan niadtong mga pundok nga nangita sa gitawag nga gender equality mao nga mas menos ang silot sa concubinage kay sa adultery. Ang gilikayan man gud sa balaod mahitungod sa adultery mao nga tingalig mamunga ang pagpakasala sa asawa ug ang bana mao na unya ang magbuhi sa anak sa laing tawo.
Mao kana nga ang usa ka bana nga himun-og kaayog asawa, nisulti sa iyang asawa nga nagbasol na siya sa iyang gibuhat ug misaad nga moundang na siya sa pagkulata sa iyang asawa. Niingon ang asawa, “Sukad karon, ang sunod natong anak imo na.” Sama niadtong magtiayon nga nagbuwag ug nagtunga sila sa ilang unom ka mga anak. Ang bana maoy unang nipili ug maoy gipili ang mga guwapo ug guwapa. Matod pas asawa, “Naunsa ka? Pataka ka lang og pili. Maoy imong gipili nang dili imo.”
(Ang atong paghisgut-hisgot mahitungod sa balaud madungog na matag karon ug unya sa mga tampo nga dunay punto legal ngadto sa tulomanon nga “Alang Kanimo Kapuso” nga gisibya gikan sa ala-una ngadto sa alas dos sa hapon sa sibyaan DYSS Superadyo sa RGMA network.)