SI Cebu City Vice Mayor Edgardo Labella niingon nga usa ka “monster” ang kahuot sa trapiko sa Barangay Mambaling, syudad sa Sugbo, tungod sa pagpatuman sa usa ka underpass project sa N. Bacalso Avenue. Gibana-bana nga molungtad pa kini og duha ka tuig.
Ang monster usa ka linalang nga makalisang ug makahadlok. Sa mga bata pa kita, hadlukon dayon kita sa mga monster nga motukob sa mga bata, ilabi na sa mangitngit nga kagabhion.
Apan ang monster nga trapiko sa Mambaling maka-lisang bisan kon adlawan pa nga maoy tigdagsa sa mga sakyanan. Pun-an pa sa hagip-ot nga access road sa mga public utility jeepneys (PUJ) sama sa E. Sabellano Street human sa pagsira sa F. Llamas Street.
u25cf ● ●
Si Cebu City Mayor Tomas Osmeña gustong sulbaron kini pinaagi sa paghangyo sa konseho sa syudad sa pagdeklarar og usa ka state of emergency aron makaagi ang mga PUJs sa Cebu South Coastal Road (CSCR). Kon makaagi ang mga PUJs sa coastal road, malugak-lugak na ang trapiko didto sa N. Bacalso Avenue.
Apan alang kang Labella, si Osmena maoy amahan sa maong monster. ‘He (Osmena) now projects himself as a monster slayer when the truth is that he is the monster’s father,” matod pa ni Labella.
Nganong si Osmena man maoy amahan sa grabeng trapiko sa Mambaling? Sumala pa ni Labella, malikayan unta ang maong sitwasyon kon wa pa magdali-dali ang pipila ka opisyales sa syudad.
u25cf ● ●
Matod pa ni Labella gipadaplin una sa miaging administrasyon ang maong proyekto kay gihimong rikisito nga kinahanglang dunay mga alternate routes ug palapdan ang mga access roads sa di pa mohatag og go-signal ang Department of Public Works and Highways (DPWH) 7 sa contractor.
“But for reasons that only the mayor could explain, as soon as he took over, he disregarded our previous warnings and prodded the DPWH to start the project of his political ally, the Cebu City south congressman (Rodrigo Abellanosa) without asking for traffic mitigating measures. That was, and remains, unforgivable,” matod pa ni Labella.
u25cf ● ●
Karon nga gibutyag ni Labella nga si Osmeña maoy amahan sa monster, unsa may ngan sa monster? Sa usa ka esena sa pelikula nga “Mary Shelley’s Frankenstein” (1994), nakit-an ni Captain Robert Walton ang monster nga naghilak ibabaw sa patay nga lawas ni Dr. Victor Frankenstein.
Gipangutana ni Walton ang monster kon si kinsa siya. Ang iyang tubag, wa siya tagaig ngan ni Frankenstein. Nganong naghilak siya, ang tubag nga si Frankenstein maoy iyang amahan.
Ang monster naila nga Frankenstein monster. Kamo nay ngan sa monster nga trapiko sa Mambaling.