Barrita: Risgo sa propesyong legal

MATAG trabaho ug propesyon adunay risgong giatubang. Tan-awa ra nang mga trabahador nga magtaod sa mga tarpaulin sa mga higanteng billboard ug mga construction worker sa mga habog kaayong building nga morag mga Spiderman. Manggimok ug manggilok ang mga lapa-lapa niadtong magtan-aw kanila.

Lakip na niini ang propesyong legal. Apan makaingon lang kita niini kon kalambigitan ang usa ka hitabo sa propesyon sa usa ka tawo. Ato kining gihisgutan tungod sa pagbanhig ug pagpusil patay kang manlalaban Amelie Ocanada Alegre niadtong miaging Huwebes sa gabii samtang nagmaneho sa iyang sakyanan didto sa Barangay Looc sa dakbayan sa Mandaue. Laing abogado, si kanhi Mandaue City administrator Briccio Boholst, ug laing kauban sa ilang opisian nasamdan sa maong hitabo.

Sukad sa tuig 2004, unom na ka mga abogado ang gipatay dinhi sa Sugbo. Usa ka piskal ang nasamdan apan nakalingkawas. Ang labing ulahi nga pagpatay nga gisundan sa kaso ni Alegre mao ang pagbanhig ni manlalaban Noel Archival niadtong Pebrero 8, 2014 didto sa lungsod sa Dalaguete. Laing duha niya ka mga kauban ang napatay samtang usa ang samaran. Gipasakaan og kasong murder ang mga sakop sa Highway Patrol Group-7 nga karon nanibat na. Apan nagpadayon pa ang kaso.  

Niadtong tuig 2013, si manlalaban Jubian Achas gipatay sa kaatbang sa iyang gilabanan sud mismo sa korte didto sa Palace of Justice. Patay sab ang iyang kliyente nga si Dr. Rene Rafols. Samdan sa maong hitabo si Assistant Cebu City Prosecutor Maria Theresa Calibugan-Casino apan nakalingkawas. Ang nagpusil nga si John Pope, usa ka retiradong Canadian national, giingon nga nagpusil sa iyang kaugalingon ug patay usab.

Niadtong tuig 2010, si kanhi Regional State Pro­secutor Hernando Masangkay gipatay sud sa iyang pinuy-anan sa syudad sa Talisay. Sa tuig 2009, si Assistant Cebu City Prosecutor Patrick Ian Osorio gibanhigan samtang nagmaneho sa iyang sakyanan didto sa Barangay Mambaling, syudad sa Sugbo.

Sa tuig 2008, si manlalaban Richard William Sison gibanhigan samtang nagma­neho sa iyang sakyanan dinhi sa syudad sa Sugbo. Samtang niadtong tuig 2004, gipusil patay si manlalaban Arbet Sta. Ana-Yongco sud sa iyang opisina nga diha ra sab sa iyang balay sa Barangay Zapatera, syudad sa Sugbo. Siya maoy private prosecutor sa kasong parricide batok kang kanhi kongresista Ruben Ecleo, nga nakonbikto sa pagpatay sa iyang asawa nga si Alona.

Sa makadaghan ka higayon, atong gipasabot nga ang mga abogado igo lang nga mokupot sa kaso ug moatubang sa korte aron pagpresentar sa mga katarungan sa iyang gilabanan nga kliyente. Way labot ang abogado sa unsa may giawayan, gawas lang kon ang abogado na mismo mao ang kihante o kaha maoy gikiha o sinumbong.

Makahinumdom lang ko niadtong estorya sa usa ka akusado nga niduol sa usa ka abogado ug niingon nga wa siyay kuwarta, pero para sa acceptance fee, mohatag siyag Montero ug kon modaug sa kaso, pun-an niyag Land Cruiser. “Unsa man diay ang imong kaso,” pangutana sa abogado. “Carnapping torni,” tubag sa akusado.

(Ang atong paghisgut-hisgot mahitungod sa balaud madungog na matag karon ug unya sa mga tampo nga dunay punto legal ngadto sa tulomanon nga “Alang Kanimo Kapuso” nga gisibya  gikan sa ala-una ngadto sa alas dos sa hapon sa sibyaan DYSS Superadyo sa RGMA network.)

(Sa mga reaksyon kang Atty. Eddie O. Barrita: E-mail: edbarrita@yahoo.com; Cell # 09165805285; Room 201, 18 Cherry Court Bldg., Gen. Maxilom Ave., Cebu City)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph