SAPON sa Laguindingan Airport ang usa ka batan-on nga anak sa barangay kapitan nga naghupot og party drugs sa lungsod sa Laguindingan, Misamis Oriental.
Sikop sa Philippine Drug Enforcement Agency (PDEA)-Northern Mindanao uban sa kapolisan sa Cagayan de Oro City Police Office (Cocpo) si Ralph Rafanan, kinsa giingong anak sa usa ka barangay kapitan sa dakbayan sa Cagayan de Oro.
Si PDEA-Northern Mindanao agent Ben Calibre niingon nga nakuhaan ang suspek og mokabat 17 ka tabletas sa ecstasy kon party drugs nga gibana-banang mapalit og tag P3 mil matag usa tungod kay taas-taas nga level sa sosyedad lamang ang maka-afford niini.
Matud ni Calibre nga lipay kaayo sila sa Cocpo nga maoy nag-feed kanila sa luto na kaayo nga impormasyon ug usa kini ka dako nga advantage kon adunay pagtinabangay gikan sa kapolisan.
Pauli sa dakbayan sa Cagayan de Oro ang dinakpan hinungdan ila dayon kining giambakan og nagpositibo ang operasyon pag-intercept sa pagkakuha sa mga tabletas gikan sa suspek.
Kining mga party drugs adunay panghatagan ang suspek niini nga iyang mga higala.
Dugang ni Calibre nga kini ang unang higayon nga niabot na sa dalbayan ang susama niining ginadili nga druga.
Kon imnon kini moepekto human sa 30 ngadto 45 minutos ug depende kon unsay tripping sa nakainom niini tungod kay extreme happiness ang resulta sa tambal ug go with the flow labina kon panahon sa party.
Dugang sab ni Calibre nga delikado kini nga tabletas tungod kay apektado ang utok sa usa ka tawo.
Ang dinakpan kinsa gibalhog na karon sa prisuhan sa PDEA 10 ang nidumili sa paghatag og pamahayag sa mga sakop sa prensa.
Dugang ni Calibre nga ang inahan niini nakatawag sa ilang buhatan ug mikumpirma nga anak ang dinakpan ug bukas ang buhatan kon bisitahon ang suspek.
Gikatakdang mag-atubang og kasong supak sa RA 9165 kon Dangerous Drug Act ang dinakpan.