NAGPATALA ang usa ka bayot human nga gihulga ug gisunod-sunod sa iyang uyab human kini mag-away tungod sa password sa iyang social media account Martes sa buntag, Agosto 30, sa Barangay 31, dakbayan sa Cagayan de Oro.
Si Jessa (dili tinuod nga ngalan), 22, usa ka bayot ug residente sa Zone-2, Bulua ning dakbayan, ug usa ka call center agent ang nidangop sa kapolisan ug gireklamo si Rudy (bansagon gitago), taga Camaman-an ning dakbayan.
Sa nahipos nga impormasiyon, giingon nga sa dihang nagbaklay na ang biktima kauban ang mga katrabaho, gisundan kini sa suspek ug gibira-bira ang biktima ug gihulga pa kini sa pag-ingon, "basin naa’y mahitabo."
Nasayran nga magduha pa kini sila ka tuig nga managhigugma diin mao kini ang batasan sa lalaki apan ning panahona, naglisod na ang bayot og sabot hinungdan nga buot na kining makigbulag apan dili madawat sa lalaki.
Tungod lang sa Facebook ug sa password ang hinungdan sa ilang panag-away nga miresulta sa pag-harass sa lalaki ngadto na sa bayot nga hinigugma.
Sa pagsulat niini nga balita, ang insidente ang nakatala na sa buhatan sa kapolisan sa Police Station 2 sa Cogon ug giduso na sa Barangay Lupon alang sa tukmang disposasiyon.