NAPAOS og siniyagit sa kasuko og kinasaba sa iyang anak akong silingan nga si Rosie (dili tinuod ngalan) dihang iyang gikastigo kay nakasala na sab. Nagbagolbol kay matod niya kusog na mosukol, bakakon, maayong molihay, ug nabungol na sa kinasaba. Gusto na niyang i-surrender ug ipa-adopt sa gobyerno kay wala namay modawat nga kaila o parente kay kuno ligoy.
Dako og tahas kitang mga ginikanan pag-giya sa atong mga anak para sila modako nga himsog, malipayon, matinahuron og utukan.
Usa sa mga yawe para magkasinabot ang mga anak ug ginikanan mao ang abring kumonikasyon.
Matod sa American Psychological Association (APA), ang pagpaminaw sa mga yangongo ug problema usa ka epiktibong paagi aron madungog ug masabtan ang mga nagrigor nga gipamati ug isyo sa mga bata.
Busa ayaw pagpunay og putak ug abre sa baba sa panahon nga ang bata dunay isulti. Mas masabtan sa bata ang tubag kon kini simple ug mubo.
Paninguhaa nga imong mapugngan ang pag-gawas sa mga bastos ug law-ay nga mga pulong sama sa ‘atay, bogo, pesti, hinampak ug uban pa’ aron di nila masunod.
Likayi sab ang pagsiyagit. Mas modulot ang imong mga punto kon hinay ang tingog inig pasabot ug adto sa lugar nga kamo rang duha aron dili mauwawan.
Usahay, di kalikayan nga madala ang trabahoon sa balay. Kon kini mahitabo, ayaw sipayata pagpahat og oras para nila magabi-i una mangatulog aron sa pagpamati sa ilang mga gipanghimo ug mga aktibidad sa balay ug tunghaan.
Ipadaplin una ang telepono, electronic gadgets ug mga ginbuhaton kon makig-estorya kay kini makatabang pagtudlo og respito ug pagsabot.
Ayaw limiti sa halok, halog ug pagsulti og “I love you” imong anak. Imong pasabton nga normal ra iyang gibati ug nga ikaw, sama sa uban, makasinati sab og kahadlok, kaguol, kalipay ug kahingawa.
Ako motuo nga way bata nga gipakatawo ning kalibutan nga nagtangag og problema, hinuon, dunay mga bata nga nagpabadlong kay dunay gikom-kom nga problema ug kayugot nga nanawag og atensiyon ug tabang.