GIPAABOT ang gamay nga kahuot sa dagan sa mga sakyanan sa pipila ka lugar sa dakbayan sa Sugbo karong buntag sa pagbiyahe sa Birhen Maria sa Lindogon gikan sa Barangay Simala, lungsod sa Sibonga paingon sa siyudad.
Ang imahe sa Birhen dad-on pinaagi sa convoy sa 20 ka mga sakyanan uban sa mga pulis nga manukad alas 8 sa buntag gikan sa Simala.
Anha kini moagi sa siyudad sa Talisay, moliko sa tuo sa Cebu South Coastal Road agi sa South Road Properties dayon sa Plaza Independencia dayon mosubay sa Radisson Blu Hotel, moliko sa wala sa Pope John Paul II Avenue ug mosud sa International Eucharistic Congress (IEC) Pavilion sa Barangay Mabolo.
Sugaton kini og misa nga pangunahan ni Arsobispo Jose Palma sa alas 12 sa udto.
Karong alas 7:30 sa gabii, himuon ang konsiyerto nga giulohan og “For Mama Mary: It’s All About Her” sa IEC Pavilion.
Ugma sa alas 2:30 sa hapon, dad-on ang imahen sa Basilica Minore Del Sto. Niño.