IMAHEN sa Birhen sa Lindogon, Simala, Sibonga gitakdang mobisita sa Archdiocese sa Sugbo sunod buwan alang sa mga rilihiyusong kalihukan.
Napanglantawan nga modagsa ang mga debotong Katoliko sa mga simbahan nga bisitahan sa milagrusong imahen ni Birhen Maria hinungdan nga ang kapulisan mopatuman og hugot nga seguridad.
Kagahapon, ang mga organizer nibisita sa buhatan ni Police Regional Office (PRO) 7 Director Chief Supt. Noli Taliño aron mohangyo nga hatagan sila og area security lakip na ang road security alang sa himuon nga prosesyon.
Dali usab dayon nga nakasanong si Taliño.
Kini nunot sa hulga sa mga terorista sa tibuok nasud human sa pagpamomba sa dakbayan sa Davao nga mikalas og 14 ka mga kinabuhi.
Makig-alayon ang kapulisan sa Central Command alang sa pagdugang og pwersa.
Matod ni Taliño nga ilang ipakisama sa International Eucharistic Congress (IEC) ang paghatag sa security.
“We will treat this as a major event dito sa Cebu City dahil I’m very sure na dadagsain ng mga deboto ito. So for 3 days na event na ito ay maglalatag tayo ng sapat na security,” matod ni Taliño sa mga tigbalita.
Sa Oktubre 7 dad-on ang imahen sa Birhen sa IEC Pavilion nga i-convoy sa pagkuha sa Lindogon, Simala.
Ang convoy pagaubayan og mga pulis.
Sa sulod sa IEC Pavilion, dunay himuon nga concelebrated holy mass nga pagadumalahon ni Cebu Archbishop Jose Palma.
Sa alas 2 hangtod sa alas 5 sa hapon sa samang adlaw, dunay himuon nga pahawok ug pag-ampo sa mga deboto.
Sa Oktobre 8, dunay send off mass sa alas 12 sa udto ug pagka alas 3 sa hapon hangtod sa alas 5, dunay penitential procession gikan sa Pavilion paingon sa Basilica del Sto. Niño diin hatagan na og siguridad sa kapulisan.
Gawas sa mga pulis, makig-alayon usab sila sa Cebu City Transportation Office alang sa pagsira sa kadalanan nga agian sa prosesyon.
Awhag sa kapulisan sa publiko nga sila na mismo ang moabag sa pagpatuman sa siguridad ug kon dunay mamatikdan nga kadudahan nga lihok, mahimong motawag dayon og pulis.
Masaligon hinuon ang kapulisan nga sama sa mga dagkong kalihukan nga himuon sa Sugbo, malinawon ang pagpatuman sa siguridad.
Apan bisan pa niini, di mokompyansa ang PRO-7, mopalapad sila sa ilang intelligence monitoring alang sa mga kriminal nga mohimo og krimen dinhi sa Sugbo sa maong mga adlaw.