BOHOL - Subay sa tema nga: “Hamon ng Pagbabago, Pinagibayong Sebisyo”, dakong garbo sa kapulisan sa probinsiya ang paghakot og mga pasidungog atol sa gipahigayon nga selebrasyon sa ika -115 nga anibersaryo sa kapulisan didto sa Police Regional Office (PRO) 7 niadtong Agusto 22 nga gipangulohan ni PRO 7 regional director Noli Taliño.
Gihimo ang pagpanghatag sa ganti ug pasidungog didto sa Camp Sergio Osmeña, siyudad sa Sugbo ngadto sa mga takos nga mga indibidwal ug grupo sa kapulisan sa Central Visayas.
Wa magpauwahi ang probinsiya sa Bohol diin sa unit awards category, napili ang Bohol Province Provincial Office (BPPO) isip Best Provincial Office; ang Tagbilaran City Police Station maoy Best Component City Police Station samtang ang Panglao Police Station maoy Best Municipal Police Station.
Sa individual awards category, nakuha ni SPO4 Yolando Bagotchay Jr. gikan sa BPPO-SWAT ang Best Senior Police Non-Commissioned Officer samtang napili usab si P/Supt Nicomedes Olaivar sa dakbayan sa Tagbilaran isip Best Commissioned Officer for Operations.
Ang Best in Project TokHang (Municipal Police Station Category), 2nd place ang Sikatuna Police Station, 3rd place ang Dimiao Police Station.
Samtang sa Best in House Visitation (Municipal Police Station Category), 1st place ang Batuan Police Station, 2nd place ang Dimiao Police Station ug 3rd place ang Sikatuna Police Station.
Sa sunod-sunod nga mga operasyon nga gipahigayon sa kapulisan aron sa paghapsay sa tagsa-tagsang probinsiya, ang pagpanghatag sa mga pasidungog ngadto sa mga takos nga grupo ug indibidwal nga mga kapulisan maoy bunga sa ilang hugot nga pakigbisog sa pagbantay sa seguridad sa komunidad ilabina ang kampanya batok sa gidili nga drugas.