BISAN og way warrant of arrest batok kaniya, boluntaryong nitahan ang usa ka bombero nga nag-atubang og kasong murder.
Gipasanginlan siya nga nipatay sa usa ka Overseas Filipino Worker (OFW) sa siyudad sa Carcar niadtong Abril karong tuiga.
Niadtong Hunyo, hingpit nga napasakahan og kasong murder ngadto sa korte si SFO1 Richard Sacedon nga sakop sa Parian Fire Substation.
Gipasanginlan siya ug ang iyang pag-umangkon nga si Jerome Fernandez nga maoy nipatay sa OFW nga si Ramil Empleo niadtong Abril 11 karong tuiga.
Apan matod ni Sacedon nga inosente siya sa krimen hinungdan nga tuyo siyang nitahan ngadto sa sala ni Cebu City Regional Trial Court (RTC) Branch 17 Judge Marivic Daray.
Giingong dunay relasyon si Sacedon ug ang asawa sa gipatay nga OFW.
Gani lakip kini sa gipasakahan og kasong parricide human nga dunay saksi nga nakakita kaniya nga nitabang kang Sacedon pagdispatsar sa patayng lawas sa biktima.
Gikan sa Liburon, Carcar City, diin giingong nahitabo ang pagpatay gidala ni Sacedon ug sa iyang pag-umangkon ingun man sa asawa sa biktima ang patayng lawas niini ug didto gilabay sa Barangay Tabunan, siyudad sa Sugbo.
Niadtong Abril 14 na nadiskubrehan.
Gipadayag hinuon sa akusado nga way kamatuoran ang mga alegasyon batok kaniya hinungdan nga tuyo siyang nag-leave sa trabaho aron limpyohan ang iyang pangalan.
Giubanan siya sa iyang abogado nga si Rameses Villagonzalo atol sa iyang pagtahan sa iyang kaugalingon ngadto sa korte.
Plano nila nga moduso og counter-charges batok sa mga saksi nga niduhig sa ilang pangalan sa krimen.
Nunot sa pagtahan ni Sacedon, hayan nga mapriso siya kay wa may girekomrndar nga piyansa alang sa kasong murder nga iyang giatubang.
Hinuon, nagplano na kini paghangyo sa korte nga tugotan siyang makapiyansa nunot usab sa giingong huyang nga ebidensiya batok kaniya.