TAGBILARAN CITY - Gipalapdan pa sa Bangko Sentral ng Pilipinas (BSP) ang ilang programa nga ‘’Economic and Financial Learning Program (EFLP) alang sa tanan diin tinguha niini nga makahatag sa tanan og dugang nga kahibawo sa ka-importante sa paggahin og pondo kon savings alang sa mga emerhensiya nga panginahanglanon, pagpa-alili sa mga daan na nga kwartang papel ngadto sa bag-o nga mga desinyo sa di pa kini mawad-an og balor, pagtumbok sa kalahian sa peke nga kwarta ug ang pwedeng buhaton aron malikayan nga mamahimong biktima sa mga swindler.
Atol sa media briefing nga gipahigayon niadtong Disyembre 6, 2017, nagpahigayon og tulo ka adlaw nga seminar ang BSP ngadto sa nagkalainlaing sektor sa probinsiya sa Bohol.
Mismong ang mga kadagkuan sa BSP gikan sa nasyonal ug rehiyon 7 nga si Atty. Leonides B. Sumbi, regional director sa rehiyon 7 ug mga kawani gikan sa nasyonal nga sila Aries Gamboa, Antonio Cintura, Dennis Bautista, Ma. Victoria Francisco ug Aileen Manansala ang mipasabot sa mga partisipante kon unsay katungdanan sa BSP sa ekonomiya sa atong nasud.
Miimbitar usab sila og mga Overseas Filipino Workers (OFW) ug mga tinun-an diin mihatag usab sila og mga tip sa pagtigom aron mas maandaman ang kaugmaon sa ilang pamilya ug makatabang usab ngadto sa ginikanan ug ang paglikay sa mga mangingilad ilabina nga nagsingabot na usab ang Pasko diin posibleng manggawas na usab ang mga peke nga kwarta.
Adunay plano ang BSP nga magtukod og branch sa BSP sa Bohol apan padayon pa silang nangita og lote nga mamahimong adto ipahimutang ang ilang opisina.
Ika-unom na nga liga ang probinsiya sa Bohol sa paglibot sa nasud sa Pilipinas aron mapaabot ang ilang programa sa tibuok nasud.