TUNGOD sa kusog nga hangin nga dala sa bagyong Urduja, ubay-ubay nga mga pananom sama sa sweet corn ug saging ang nangahapay sa pipila ka mga bukirang barangay sa dakbayan sa Sugbo.
Si Nagiel Bañacia, pangu sa City Disaster Risk Reduction and Management Office (CCDRRMO), nibutyag nga pipila ka mga sweet corn nga naa daplin sa dalan sa Barangay Adlaon ang nangadaot.
Duna usab mga punoan sa saging ug manga ang nangatumba sa mga barangay Sudlon I, Cambinocot ug Lusaran.
“Kusog ang hangin sa kabukiran maoy nakaguba sa ilang crops,” sumala ni Bañacia sa interview sa Superbalita Cebu kagabii.
May kahoy usa ka dekada na ang panuigon nga nagbarog sa Sitio Tabla, Barangay Sudlon I ang natumba duol sa simbahan kagahapon sa kaadlawon, diin gipahigayon ang unang adlaw sa Misa de Gallo.
Wa hinuon naangol sa hitabo samtang wala usab madanyos ang simbahan.
Si Bañacia ug mga sakop dali nakapahigayon og clearing operation sa mga dapit diin dunay mga punoan sa kahoy nga nangatumba ug nakababag sa mga karsada.
Giputol usab nila ang mga punoan sa kahoy nga padung na mabali.
Duna usab gamay nga pagdahili sa yuta ang nahitabo sa Barangay Sirao.
Si Engr. Al Quiblat, pangu sa Philippine Atmospheric, Geophysical and Astronomical Services Administration (Pagasa), niingon nga padayon masinati sa Sugbo ang katag nga pag-ulan nga makamugna og mga baha, landslide ug sinkholes.
Sa Miyerkules, gipaabot mogawas ang bagyong Urduja sa Philippine Area of Responsibility.
Sa datus sa Cebu Coast Guard pinaagi sa commander niini nga si Jerome Cayabyab, niabot na sa 62 ka mga sakyanan sa kadagatan ang wala nila pabiyahia lakip na usab ang siyam ka mga cargo vessel.
Lakip sa mga biyahe nga kanselado ang gikan sa pipila ka pantalan sa Sugbo paingon sa Leyte, Bohol, Negros Occidental, Masbate, Siquijor, Cagayan ug uban pa. (SCG & HBL)