ANG Holy Cross of Davao College (HCDC) Crusaders miangkon sa nag-inusarang bulawang medalya sa pagtapos sa 9th Bimp-Eaga Friendship Games nga gihimo sa Samarinda, East Kalimantan, Indonesia, Dominggo, Disyembre 11.
Mga Dabawenyo mipildi sa South Sulawesi, 109-63, sa uwahing game sa round-robin format competition diin ang defending champion nga Sabah wala miapil.
Kahinumdoman nga ang Sabah mipildi sa Davao City alang sa bulawan sa eighth edition sa biennial Games nga gihimo sa Labuan, Malaysia niadtong 2014.
Ang Central Kalimantan (Kalteng) ug South Sulawesi mipupo sa plata ug bronse.
Ang Davao City miguwa nga kampeyon uban ang limpyo nga 4-0, win-loss card.
Si HCDC coach Isaias "Ice" Gravador nagsulti nga lima lamang ka tim ang nakasud sa torneyo.
Niya pa, luyo sa Davao City nga nagrepresenta sa Team Mindanao, ang uban pulos na gikan sa Indonesia.
"Average 40 plus points among daug sa mga nakadula namo. Modikit sila sa first quarter pero usually maka-start mi og lamang sa second quarter."
Ang kadaugan maoy ikatulong titulo ni Gravador alang sa Crusaders human sila nagmalampuson sa Dacs Sportsfest ug Eaga Games qualifying tournament.
Ang Davao squad mipildi sab sa Kalteng, Kaltim ug Kaltara.
Ang Davao City's tandem nila Rex Paller sa Jose Maria College ug Jan Ashley Jacob sa University of Mindanao miangkon og bronse human gidabu-dabohan ang South Sulawesi, 21-17, 21-16 sa battle for third.
Ang sepak takraw team mibitbit sab og duha ka bronse.
Ang delegasyon sa Davao nga mitigi sa karatedo, athletics, lawn tennis, tennnis ug badminton, moabot karong Miyerkules.
r