DIGOS CITY – Gi-monitor sa City Disaster Risk Reduction and Management Council (CDRRMC) sa dakbayan ang kahimtang sa panahon tungod sa nasinating kalit nga pagbaha niadtong Martes sa hapon, Septembre 19.
Nakurat na lamang ang mga molupyo dihang gibaha ang pipila ka mga bahin sa dakbayan ug midahili ang yuta didto sa Barangay Cogon kon diin apektado ang Davao-Cotabato national highway.
Gibaha sab ang dalang Quezon Avenue hinungdan nga hilabihan ka-trapik ang dalan.
Gilayong mihimo og lakang ang CDRRMC aron malikay sa disgrasya ang mga molupyo ilabi na nga daghang punoan sa kahoy ang misubay sa dalan.
Hinuon, gibutyag ni Marcelino Niemes, CDRMMC action officer, nga way kinabuhing naangol o nakalas niadtong higayona.
Matag karon ug unya nga gi-monitor sa CDRRMC ang kahimtang sa kabukiran sanglit di kapugngan nga mokalit lang og baha sa dakbayan tungod sa kusog nga uwan sa bukid.
Di pa dugay, natanggong sab ang daghang sakyanan sa Barangay Colorado human kalit niawas ang tubig sa mga gagmay'ng sapa.
Nanaghap ang CDRRMC nga climate change ang hinungdan sa di na masabtan nga dagan sa panahon sa taknang mouwan. (OBD)