Chickenjoy ang nakapakanaug sa lalake

VALUE meal nga fried chicken sa usa ka fastfood chain ray nakakombinser sa usa ka lalake sa pagkanaug gikan sa billboard nga iyang gikatkatan sa may mga eskina sa dan Borromeo ug Colon, dakbayan sa Sugbo kagahapon sa buntag.

Ang hitabo nakamugna og pagkabara sa trapiko.

Sa wa pa mosaka si Lino (di tinuod niyang ngan), 40, giingong dispatser duol sa usa ka mall sa dalan Leon Kilat, nakit-an siyang nagpaso-paso sa karsada.

Dayon mga alas 6:20 sa buntag, nisaka siya likod sa edipisyo ngadto sa billboard nga gibana-banang dunay gitas-ong 40 metros.

Si Chief Insp. Noel Lomente niingon nga usa ka gwardiya sa lugar ingon man vendor nakakita kang Candido nga naglakaw nga dunay gidalang plastic nga dunay pagkaon.

Ilang nabantayan wa sa kaugalingong apan nakugang sila kay kalit nga nikatkat sa likod sa building dayon midiretso sa ibabaw hangtod sa billboard.

Nabulabog ang mga tawo sa dapit ug dali nilang gi-cordon ang dapit inabagan sa mga sakop sa City Traffic Operations and Management (Citom).

Sumala pa niini gumikan sa gihimo ni Lino, grabi ang kahuot sa trapiko, daghang nagyawyaw nga mga pasahero tungod kay nilanat og kapin sa duha ka oras ang negosasyon.

Ang mga sakop sa Cebu City Disaster, mga sakop sa Bureau of Fire Protection nipahigayon og negosasyon atol sa rescue operation.

Duha ka mga rescue worker ang ningsaka sa billboard aron pagkombinser kaniya sa pagkanaog.

Hangtod nga nakahukom silang palitan ug dad-an og pagkaon si Lino sa pamasin nga gigutom ug makombinser sa pagkanaog.

“Gipalitan siyag chicken joy value meal. Gibutang lang sa mga rescuer (usa ka bahin sa billboard) unya nikanaog kay gigutom na siguro to. Mao nga nakuptan, gigapos gibutangag harness,” matod ni Lomente.

Nilanat og kapin sa duha ka oras ang hitabo kay nikanaog ang biktima mga alas 8:15 samtang nakabiya sila sa lugar mga alas 8:40 na.

“Ang amo ato nga kon kapuyon na siya, manaog o kon gutomon, dunay pagkaon nga giandam kay dili gyud madungog ang sulti niya,” dugang ni Lomente.

Ang mga usesero namakpak dihang nakakanaog na si Lino.

Ang biktima luya nga gidali nila sa pagdala sa Cebu City Medical Center (CCMMC).

Human nila madala sa CCMC, ilang gisulod si Lino sa psychiatric ward sa Vicente Sotto Memorial Medical Center.

Way mga tawo nga nakaila kang Lino samtang ang mga batang libud suroy niingon nga dispatser sa PUJ sa dapit.

Sa pagsuwat ning taho, wa pay bisan usa nga niduso og reklamo batok kang Lino.

Si Harold Alcontin, pangu sa city disaster office sa north sector sa Cebu City nga nahinabi sa mga tigbalita nagkanayon nga ila pang gipangutana si Lino unsay problema apan wa mosulti.

Kini maoy ikaduhang higayon nga dunay nikatkat sa billboard sa dakbayan sa Sugbo ning buwana.

Si Poloy, 18, nikatkat sa billboard sa may General Maxilom niadtong Hulyo 17 sa gabii.

Nikanaog siya human sa pipila ka oras nga negosasyon nga gipangulohan ni Bise Mayor Edgardo Labella.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph