CLJV napiliang motukod sa ikatulo nga taytayan

SA unang quarter sa 2018, masugdan na ang pagpaba­rog sa labing gipaabot nga ikatulong taytayan sa Sugbo nga magsumpay sa dakbayan sa Sugbo ug lungsod sa Cordova, isla sa Mactan.

Ang Cebu Link Joint Venture (CLJV) naisyuhan na og Notice of Award alang sa “Design and Build” contract sa 8.5 kilometros nga Cebu-Cordova Link Expressway.

Ang nasabotan nga kontrata kay mobalor og P22.6 bil­yones.

Ang Cebu Cordova Link Ex­pressway Corp. (CCLEC) maoy niisyu sa Notice of Award sa CLJV niadtong Nobiyembre 23, 2017.

Ang CLJV usa ka joint-venture sa Acciona Construccion S.A., nga nagbase sa Espanya ug First Balfour Inc. nagbase sa Pilipinas ug D.M. Consunji Inc., nga pulos dunay maayo nga track records sa nag-unang mga proyekto sa imprastruktura.

Ang CCLEC usa ka subsidiary company sa Metro Pacific Tollways Corp. (MPTC), ang toll road arm sa Metro Pacific Investments Corporation (MPIC).

Ang MPTC ang labing kinadak-an nga toll road concessionaire ug operator sa Pilipinas nga nipalapad sa iyang operasyon sa ubang mga nasod sa Asya sama sa Thailand, Vietnam ug Indonesia.

Si kanhi Cordova mayor Adelino Sitoy, kasamtangan nga pangu sa Presidential Le­gislative Liaison Office (PLLO), nibutyag nga sa unang quarter sa sunod tuig sugdan na ang pagbutang sa physical structures sa taytayan.

Si Ruben Camba sa Acciona namahayag nga labing eksperinsyado nga team ang ilang patrabahuon sa proyekto alang sa pagtukod sa bag-ong tulay nga makabenepisyo sa lokal nga mga komunidad ug sa nasod.

“We are delighted to be part of this landmark project,” pahayag niini sa press statement nga nadawat sa Superbalita Cebu kagahapon.

Si CCLEC president ug general manager Allan Alfon masaligon nga mahatag nila ang dekalidad nga state-of-the-art nga taytayan nga di lang mopasayon sa biyahe kondi mopalambo usab sa ekonomiya sa Kabisay-an.

“We are happy to be given this opportunity to bring to Cebu and share with the Cebuanos and the people in the Visayas in general, our company’s expertise in building and operating world-class highways and bridges to create more opportunities and spur economic growth,” sumala ni MPTC president Rodrigo Franco.

Si Presidente Rodrigo Du­terte ang nangu sa groundbreaking ceremony sa proyekto niadtong Marso 2, 2017.

Duha ka langyaw nga mga contractor ang ni-qua­lify sa bidding ug nilagda og joint-venture agreement sa lokal nga mga contractor.

Tinguha nga mahuman ang katukoran sa ikatulong taytayan sa 2020 o maatol usab nga saulogon ang ika 500 ka tuig nga paghandum sa pagsugod sa Kristiyanismo sa Pilipinas labi na sa Sugbo.

Ang CCLEC ang motukod, mo-operate ug mo-maintain sa toll bridge pinaagi sa joint-venture agreement sa lokal nga mga kagamhanan sa dakbayan sa Sugbo ug Cordova.