GIPAKURATAN sa City Mayors Office (CMO) ang City Social Services and Development Office (CCSDO) human midaug, 25-22, 25-5, aron nga angkunon ang ikaduhang "seed" sa bracket A sa katapusang hugna sa eliminasyon sa City Government Employees Sports Festival 2017 Volleyball Competition gihimo sa Davao City Recreation Center niadtong Martes, Septembre 19.
Misalig ang CMO sa serbisyo ni Josylea Ortizo kinsa maoy miarangkada sa "nine-point rally" sa ikaduhang set aron nga kompletuhon ang kinatibuk-ang 12 ka markers sa tibuok duwa.
Nakakuha sab sila og abag gikan sa ilang opposite hitter nga si Red Alaud aron tabangan ang tim makaabot sa cross-over semifinals gitakda karong adlaw sa samang lugar.
Si CMO coach Jobo Garduque, sa paghinabi uban sa SunStar Davao, naglaum nga ang daug mohatud kanila ngadto sa finals.
"Mag pa-practice lang kami after the game tulad ng ginagawa namin palagi," sigun ni Garduque.
Sumala ni Garduque, ang ilang teamwork maoy midala kanila ngadto sa semis samtang gihisgutan niya ang dugang paningkamot nila ni Alaud, Shane Juson, Joan Sanoy, Irene Madayano ug Sunshine Fajardo.
Samtang ang Davao City Administrator's Office nakarekober gikan sa unang kapildihan sa unang set aron pakamangon ang Davao City Engineer's Office 22-25, 25-23, 25-18, aron nga makaseguro na sa top seed sa bracket A sa torneyo nga gitugotan sa Balibolista de Dabaw.
Ang torneyo gipresentar sa Human Resource Management Office sa pakig-abag uban sa Sports Development Division-City Mayors Office ug Davao City Hall Employees Association.