'BABAE, babawi, babangon.'
Kini ang tema nga nagtuyok sa newest afternoon serye sa GMA-7 nga Contessa, diin bida si Glaiza de Castro.
Dalhan sa aktres ang papel ni Contessa/Beatrice “Bea” Resureccion nga gisukod sa kapalaran, napriso human gipasanginlan nga gipatay ang bana.
"Sobrang happy ko, kasi the role itself is very challenging," ni Glaiza sa press conference sa New Asia Restaurant, Villa Abrille Davao City, Marso 7.
Dugang sa aktres nga ang serye nagsalamin sa paningkamot ug pagkab-ot sa hustisya sa saktong pamaagi.
Sa pikas bahin, aminadong gipangulbaan sab si Jak Roberto sa bag-ong role nga gidalhan niya sa serye.
Goodbye pa-tweetums ang peg sa aktor, human ang mas hugot nga mga eksena sa Contessa.
"Nung story conference na-shock ako sa mga makakasama ko, it's a new challenge sa akin to exert more on my craft."
Sa serye, si Jak mao si Santiago 'Jong' Generoso Jr., suod nga higala ni Bea nga hilum nga nahigugma kaniya.
Ubang karakter sa istorya mao sila Geoff Eigenmann, Gabby Eigenmann, Lauren Young, Mark Herras.
Anaa sab ang mga respetadong aktor sa industriya sama nila Chanda Romero ug Tetchie Agbayani.
Mokumpleto sa casts mao sila Leandro Baldemor, Dominic Roco, Bernadette Allyson, Melissa Mendez, Tanya Gomez, Karel Marquez, Phytos Ramirez, Denise Barbacena ug Will Ashley.
Luyo sa powerful ug puno sa emosyon nga serye ang creative director nga si Roy Iglesias uban sila Marlon Miguel (concept creator), Christine Novicio (head writer), Dude Cruz (creative head for afternoon prime block) ug Kit Langit (creative consultant).
Ang serye i-derehe ni Albert Langitan nga mao say utok sa top-rating afternoon series nga Impostora.
Human sa press conference mibiyahe sila Glaiza ug Jak padung Tagum City alang sa Kapuso Mall Show sa Gaisano Mall of Tagum.
Atangi ang makahinam nga istorya sa Contessa karong sugod karong Marso 19 sa GMA Afternoon Prime paghuman sa Eat Bulaga.