GIIMBESTIGAHAN karon sa kapolisan sa Catarman Police Station ang giingong pagpamaak sa usa ka polis ug pagpanion niini og pistola ngadto sa usa ka maestra sulod sa classroom niini sa Barangay Bonbon Elementary School, Barangay Bonbon, Catarman probinsya sa Camiguin.
Nahitabo ang insidente mga alas 10 sa buntag niadtong adlaw’ng Lunes, Disyembre 12, sulod sa classroom sa Grade 3 ubos ni Teacher Lea (bansagon gitago).
Giila ang polis nga mao si Police Officer 3 Luther Narbasa nga nadestino sa Sagay Police Station kinsa misulod sa tunghaan niadtong tungora ug gani gipasulod kini sa nagbantay sa gate tungod kay mayo man usab ang approach niini.
Apan pag-abot sa sulod sa classroom giiingon sa mga estudyante nga mga nakasaksi nga kalit lang nasuko si Narbasa ug nagbinayloay og dili maayong pulong ang duha.
Nakita sab sa mga tinun-an nga gusto kuhaon ni Narbasa ang cellphone sa maestra apan kay dili man ihatag niini gibira ug gipaak pa ang dunggan sa maestra.
Sunod nga nahitabo mihublot kini sa iyang pistol ug gition ngadto sa maestra nga giingong maoy gikahadlok pag-ayo sa mga tinun-an sa sulod.
Miresponde ang Catarman Police Station niadtong tungora ug gidala sa presinto ang maestro ug polis.
Apan matud sa hepe sa istasyon nga si Police Inspector Arvin Jay Lacambra nga naareglo na ang maong insidente.
Apan si Kapitan Christopher Rodriguez kinsa kapitan sa Bonbon nisulti nga siya mismo mopasaka og kaso sa maong polis tungod sa pag-abuso niini.
“Dawbi kung nakapabuto kadto siya sa iyang pistola di madamay ang mga tinun-an usa pa pag-abuso iyang gihimo kay sulod kana sa tunghaan,” matud ni Rodriguez sa usa ka sibyaan sa radyo.
Daw wala sab niya gikalipay ang giingong pagresponde sa mga polis tungod ka yang maestra ra maoy gipasakay sa patrol samtang ang polis nibalik og angkas sa motorsiklo niini.
Hinuon nipasalig si Lacambra nga imbestigahan kini og maayo ning panahona labina migawas ang report nga daw selos ang hinungdan sa insidente.