DAVAO DEL SUR -- Paabton og kapin 4 mil ang tanang masikop ug boluntaryong motahan nga nalambigit sa ilegal nga druga sa Davao del Sur Provincial Police Office (DSPPO) hangtud Disyembre 31 ning tuiga.
Kini mismo ang gibutyag ni Senior Superintendent Samuel Gadingan, provincial police director nga gihinabi sa SunStar SuperBalita Martes, Disyembre 13.
Sumala sa opisyal nga mas gipakusgan pa sa intelligence section sa DSPPO ang monitoring sa tanang tigpayuhot og druga sa probinsiya.
Adunay target nga 4,784 ang DSPPO sa tanang madakpan ug motahan kutob sa katapusang adlaw ning naghinapos nga tuig 2016.
Gumikan niini, gitahasan sa DSPPO ang tanang istasyon sa 10 ka mga lungsod sa probinsiya nga mohimo og balidasyon aron ilhon ang mga nalakip sa bag-ong listahan sa tigpayuhot og druga.
Apil nga subayon ang mga gipangsumbong sa mga nitahan ug nadakpan sa kapulisan kon kinsa ang tig-suplay kanila sa ilegal nga druga.
Giklaro ni Gadingan nga padayong nagmagahi ang uban sa pagtahan mao nga gikinahanglan ang kooperasyon sa publiko aron daling madakpan ang mga adik ug padayong nagabaligya og druga.
Si Gadingan nihangop sa gihimong programa sa Bansalan Municipal Police Station nga naglusad og "TokBox" (Tokhang Drop Box) nga gipakatag niini sa publikong lugar.
Sa maong box o kahon, dunay gamay nga porma sa gawas niini nga i-fill out sa usa ka concern citizen aron isumbong ang nahibaw-an nila kalabot sa ilegal nga druga.
Konpidensiyal ang ngalan sa motaho pinaagi sa TokBox mao nga naglaum ang kapulisan nga mas daling mapaabot kanila ang impormasyon nga ipailawom sab sa balidasyon.
Sumala sa DSPPO mahimo sab kining kopyahon sa ubang istasyon sanglit pinakauna kini Davao Region pinaagi sa inisyatibo sa Bansalan MPS.
Sa kasamtangan, nanawagan ang kapulisan sa kooperasyon sa publiko aron mahimong drug free ang Davao del Sur sa tuig 2017.