BANGIS nga nibangon ang Davao Executives sa ilang ikatulo ka round nga kapildehan aron angkonon ang kampyonato sa 4th Barangay Tablon Three-Board Classification Chess Team Tournament niadtong Domingo didto sa Tablon covered court.
Nihuman ang Davao Executives nila RP Oympiad men's team captain James Infiesto, Engineer Allan Diez ug Ruel Baclayon sa 12 puntos, usa ka punto nga biya sa nagsunod.
Nabara ang Davao Executives sa ilang kamaomao nga kapildihan batok sa top seed RCANS Team nga gilangkoban sa mga batan-on nga sila Romeo Canino, Aljie Cantonjos ug Me Ann Baclayon.
Gikan ana, giharos sa Davao Executives ang ilang nahibilin nga rounds gikan sa ika-upat paingon sa ikapito nga round.
Nagkalayo ang RCANS human maangkon nila ang solong liderato nga walay tatsa human sa ikalima nga round.
Apan didto nabuhi ang tsansa sa Davao Executives human gipildi ang RCANS sa King's Indian Travel and Tours sa ikaunom nga round diin nahimong upat na sila ang mag-ilog sa kampyonato sa kataposan nga round.
Nahimo nalang dayon sa duha tali sa Davao ug King's Indian ang nag-ilog sa titulo human magtabla ang RCANS ug Barroso Farm Team B sa sayo.
Nibayani sila Infiesto ug Baclayon sa Davao Execs human midaug sa ilang kadaiyang board assignments aron bit-biton ang tam-is nga Php 15,000 nga cash prize.
Nagtabla ang Barroso, 7C Sharingan, Gingoog Chess Team ug RCANS sa ikaduha paingon sa ikalima nga pwesto nga parehas adunay 11 puntos matag usa.
Magtunga sila sa premyo sa maong mga pwesto.