ANG hepe sa Central 911 gitahasan ni Mayor Sara Duterte-Carpio paghatud sa hinabang pinansyal sa lokal nga gobyerno sa Davao ngadto sa mga biktima sa bagyong Lawin sa Northern Luzon.
Sulod sa lima ka adlaw, si Emmanuel Jaldon mang-apud-apod sa P5 milyones nga hinabang pinansyal ngadto sa mga lugar nga naigo sa bagyo sama sa Cagayan Valley, Ilocos Norte, La Union, Apayao, ug Kalinga.
Si Jaldon nagsulti nga ang pagbisita nila nagmalampuson.
“The entire visit was a complete success,” suma niya.
“They were all so grateful for the help of the city, they were happy for the assistance and that it was handed to them personally,” dugang niya.
Si Jaldon nagsulti nga ang lima ka adlaw nga biyahe nagtugot nila nga makita ang epekto sa bagyo.
“The most affected area was Tuguegarao. You can really see the effect of Lawin,” suma niya.
Ang team ni Jaldon nitunol sa P1.8 million ngadto sa Cagayan Valley, P900,000 sa Ilocos Norte, P200,000 sa La Union, P150,000 sa Apayao, P350,000 sa Mountain Province, ug P1.6 million sa Kalinga.
Ang team nagsugod pagbiyahe niadtong Oktubre 26, usa ka adlaw human giaprubahan sa konseho ang P5 milyones nga hinabang pinansyal sa mga biktima ni Lawin. (AD)