DENR subling mosusi sa Busay aron matabangan sa suliran

MOSUSI sunod semana ang Department of Environment and Natural Resources(DENR)-7 sa Sitio Lower Busay sa Barangay Busay kon diin nahimutang ang Busay Elementary School aron makahimo og rekomendasyon sa problema sa landslide.

Ang DENR-7 nakadawat og suwat gikan sa Barangay Busay nga naghangyo sa alang sa re-inspection sa Busay Elementary School ug permanenteng relocation site sa tunghaan human nga apektado kini landslide gumikan sa pagsige og uwan.

Matod sa tigpamaba sa DENR-7 Eddie Llamedo nga niadtong 2011, dunay report ang Mines and Geosciences Bureau sa DENR-7 nga ang Busay Elemetary School anaa sa “high to very high landslide susceptibility rating”.

Nagpaasabot kini nga ang maong lugar wa girekomendar nga tukuran og permanenteng istraktura.

Dugang ni Llamedo nga ang yuta nga gitukuran sa tunghaan hinay-hinay ang pagdahili.

Bisan mag-uwan o di, duna gyuy mahitabo nga paglihok sa yuta matag adlaw.

Wa usab sila nitambag nga himuong relocation site ang Sitio Huyuhoy tungod kay ang kahimtang niini susama lang sa Sitio Lower Busay nga delikado ug ang complex nga gihimong temporaryong tunghaan di usab luwas.

Tungod niini, sunod semana ipahigayon ang inspeksiyon sa lugar aron masuta kon matan-aw kon unsa nga mga lugar sa barangay Busay ang posible mahimong relocation site.

Aron usab marekomendar ang ahensiya manganda­man sa posibleng paggasto og dakong kantidad sa kwarta.

u201cAng MGB mohimo og re-inspection ug ocular inspection para matan-aw nato unsa nga mga areas within Busay nga possible relocation site”, matod ni Llamedo.

Nasayran 70 ngadto na sa 80 porsyento sa mga sitio sa Busay anaa sa moderate-high-to very high nga maigo sa landslide.

Gumikan kay wala naman gipagamit ang complex, mibalik sa ilang karaang school building ang mga tinun-an sa Busay Elementary School.

Kahinumduman ang maong karaang tunghaan wala na usab gamita kaniadto human nga dunay bahin niini ang naapektuhan dihang miigo ang linog dinhi sa Sugbo.

Apan karon human masusi sa Cebu City Engineering ug matod pa luwas na okupahan ang mga magtutudlo, ginikanan ug mga tinun-an nagtinabangay sa paglimpyo aron karong adlawa balik na sa normal ang klase nga gisuspenso og duha ka mga adlaw.

Hinoon giklaro sa mga magtutudlo nga di maapektuhan ang pagtungha sa mga estudyante tungod kay duna man silay Sabado nga make up class.

Gipasalig sa mga magtutudlo nga masulod ang 563 ka mga tinun-an sa maong tunghaan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph