GISUSI sa Department of Education (DepEd) ang sirkumstansya sa pagkamatay sa usa ka Grade 7 nga tinun-an sa Inayawan Night High School sa dakbayan sa Sugbo sa miaging semana.
Si Ronald Lerin, school district supervisor diin sakop sa iyang hurisdiksyon ang tunghaan, niingon nga hangyuon nila ang pamilya sa biktima nga si Clester Jake Encabo Nacional nga tugtan sila nga mapaubos sa autopsy ang lawas sa menor de edad, aron matino unsay hinungdan sa kamatayon niini.
Si Lerin nisaad nini human gitawag ang iyang atensiyon sa iyaan sa menor-de-edad nga si Sister Mary Jude Alcance sa Daughters of Mary Help of Christians/Salesians Sisters of Don Bosco.
Si Clester Jake, nagpuyo sa Barangay Cogon, Pardo, ning siyudad, gihulagway nga usa sa mga intelihente nga estudyante sa ilang klase.
“The family of the student who are very poor must be given justice on the death of Clester Jake,” matod ni Alcance.
Ang insidente nahitabo sud sa classroom sa tunghaan ug atol sa klase.
Si Alcanse niingon nga niasoy ang iyaan sa menor-de-edad nga ang inahan niini nga si Mary Ann Nacional gipahibawo nga niadtong Biyernes ang iyang anak gimandoan sa ilang magtutudlo nga mosaka sa bungbong aron dunay kuhaon.
Apan nahagbong kini sa sawog sud sa classroom.
Gumikan sa pagkahagbong, nawad-an og panimuot si Clester Jake ug gidala sa Cebu City Medical Center diin siya gideklarar nga dead on arrival.
Si Alcance unang nipahibawo ni Rizalinda Cairo, school district supervisor sa Punta Princesa Night High School, diin niadtong higayona kauban ni Cairo si Lerin.
Si Lerin niingon sa Sun.Star Cebu nga gisusi nila og maayo ang hitabo labi na ang principal sa tunghaan, Ma. Lourdes Jaca, niduso og incident report gikan sa maestra nga ang estudyante natug dihang natagak kini gikan sa iyang bangko ug namatay.
“Imposible sab og mamatay kon sa lingkuranan ra siya nahulog ilabi kon naglingkod. We need to get the details of what really happen resulting to the death of the student,” dugang ni Lerin.
Siya nidugang nga niadtong Sabado lang siya gipahibawo ni Jaca bahin sa kamatayon ni Clester Jake atol sa ilang kalihokan sa Cebu City Science High School.
Matod ni Lerin nga manginahanglan sila og mga testigo alang sa imbestigasyon aron pagsubay sa kamatuoran sa insidente.
Si PO1 Francel Buling, imbestigador sa Homicide Section sa Cebu City Police Office, niingon nga niadto sa ilang buhatan kagahapon ang inahan ug amahan sa menor-de-edad.
Matod niya gusto sa mga ginikanan nga mapaubos sa autopsy ang lawas sa namatay tungod sa pagduda nga dunay foul play sa kamatayon niini.
Base death certificate ni Clester Jake, nakatatak nga head blunt traumatic injury ang hinungdan sa pagkamatay niini.